_1693980289.gif "#")
सुनसरी । सिम चोरी गरेको आरोपमा छिमेकीकै कुटाईबाट मानसिक सन्तुलन गुमाउने पुगेकी गर्भवती महिलाले अझै न्याय पाउन सकेकी छैनन् ।
पिडकहरु विरुद्ध उजुरी दिए पनि प्रहरीले पक्राउ गर्न अझै आनाकानी गरिरहेको छन् भने छिमेकीहरुले गाउँको घटना गाउँ मिल्न भन्दै दबाब दिइरहेका छन् । प्रहरीमा किटानी जाहेरी दर्ता भएपछि मगर परिवारले घटना मिलापत्र गर्न दर्जी परिवारलाई चर्को दबाब दिइरहको छ ।
उनीहरूले शोभाको सबै उपचार खर्च तिरिदिने र केही पैसा क्षतिपूर्ति बापत पनि दिने भन्दै जाहेरी फिर्ता लिन घरमा आएर फकाइरहेका छन् । घटना मिलापत्र गराउन केही जनप्रतिनिधि पनि लागिरहेका छन ।
शोभाकी आमा देवी दर्जीले भनिन्, ‘कुटपिट गर्नेहरूलाई जोगाउनेहरू आएर गाउँको समस्या गाउँमै मिलाउनुपर्छ नत्र भोलि मिलेर बस्न गाह्रो हुन्छ भन्दै धम्क्याइरहेका छन् हामीलाई शान्तिसँग बस्न पनि गाह्रो हुनेभो ।’
गत वैशाख ३० गते दलित महिलालाई जातीय गालीगलौज गर्दै मानसिक सन्तुलन गुमाउने गरी कुटपिट गर्ने मोरङ कानेपोखरी गाउँपालिका– ५ चिसाङ बस्तीका बिन्दा मगर, पुष्पा मगर लगायत चारजना आरोपीविरुद्ध किटानी जाहेरी दर्ता गरे पनि प्रहरीले उनीहरूलाई अझै पक्राउ गर्न आनाकानी गरिरहेको छ ।
आरोपीहरू विरुद्ध प्रहरीले जातीय भेदभाव तथा छुवाछुत ऐन कसुरमा इलाका प्रहरी पथरीले ४ असारमा किटानी जाहेरी दर्ता गरेको छ । मोरङ प्रहरी प्रवक्ता डिएसपी मानबहादुर राईले आरोपीहरूविरुद्ध जातीय विभेद तथा छुवाछुत कसुरमा म्याद थप गरेर अनुसन्धान सुरु गरिसकेकाले सबै आरोपी चाँडै पक्राउ पर्ने बताए ।
उनले भने, ‘कसैले भन्दैमा र चाहँदैमा जघन्य अपराधमा दर्ता भइसकेको मुद्दा फिर्ता हुँदैन, ढिलो–चाँडो कानुनको नियन्त्रणमा आउनैपर्छ ।’
