_1693980289.gif "#")
फाइल तस्वीर
सुनसरी । यस वर्षको मनसुन सुरु भएको पहिलो सातामै देशभर बाढी पहिरोमा परि १५ जनाको मृत्यु भएको छ ।
देशभरका विभिन्न ठाउँमा बाढी पहिरोमा परि ४ दिनमा बाढी पहिरोमा परेर १५ जनाको मृत्यु हुनुका साथै २५ जना बेपत्ता भएका छन् भने ११ जना घाइते भएका छन् । गृह मन्त्रालय मातहतको राष्ट्रिय आपतकालिन कार्यसञ्चालन केन्द्रका अनुसार अहिलेसम्म ९ जना बाढीमा र ६ जना पहिरोमा परेर मृत्यु भएका छन् ।
बाढी पहिरोमा परि सिन्धुपाल्चोकमा ३ जना र सप्तरी, काभ्रेपलाञ्चोक, कास्की, अर्घाखाची, गोरखा र बाजुरामा १–१ जनाको बाढीमा परेर मृत्यु भएको छ भने डोटीमा ३ र पाल्पा, कालिकोटमा र जुम्लामा पहिरोमा परेर १–१ जनाको मृत्यु भएको छ ।
बाढी र पहिरोमा परेर सिन्धुपाल्चोकमा १५, जाजरकोटमा ७, रुपन्देही, प्यूठान र बाजुरामा १–१ जना बेपत्ता भएका छन् । बाढी पहिरोमा परि सिन्धुपाल्चोकमा ६ जना बाढीमा परेर घाइते भएका छन् भने जुम्ला, डोटीमा २–२ र स्याङजामा १ जना घाइते भएका छन् ।
हाल सम्म देशभर २२ जिल्लामा बाढी, पहिरो र अविरल बर्षाको प्रभाव परेको छ । वर्षका कारण दर्जनौं भौतिक संरचना ध्वस्त भएका छन् भने सयौं घरबार विहिन भएका छन् ।
