पेस्तोल सहित जनता समाजवादीका जिल्ला सदस्य पक्राउ

उदयपुर । अवैध हतियार सहित द्वन्दकालमा माओवादी लडाकु समेत रहेका जनता समाजवादी उदयपुरका जिल्ला सदस्य प्रशुराम चौधरी पक्राउ परेका छन् ।

उदयपुरको त्रियुगा नगरपालिका ३ मोतिगढा बस्ने ५० वर्षिय चौधरीलाई अटोमेटिक मेड इन युएसए लेखिएको १ थान पेस्तोल सहित ९ एमएम लाग्ने ५ राउण्ड गोलि सहित उदयपुर जिल्ला प्रहरीको टोलिले पक्राउ गरेको हो ।

चौधरीकी कान्छी श्रीमती श्याम कुमारी चौधरीको घरमा अवैध हतियार लुकाई राखेको भन्ने सुचनाको आधारमा प्रहरीले खानतलासी गरेको थियो । उनको साथबाट ८ ठेली चन्दा रसिद समेत फेला पारेको छ । अवैध चन्दा असुलीमा समेत सक्रिय रहेको प्रहरीले अनुमान गरेको छ ।

उनी द्वन्दकालमा नेकपा माओवादीको लडाकु थिए भने द्वन्दकाल पश्चात नेकपा माओवादी केन्द्रको जिल्ला कमिटी सदस्य तथा भातृ संगठन मजदुर संघको जिल्ला संयोजक समेत रहेको खुलेको छ । २०७७ माघ ४ गते जनता समाजवादी उदयपुरको जिल्ला कमिटी सदस्य लिएको परिचय पत्रबाट खुलेको छ ।