लकडाउन खुकुलो भए सँगै बजारमा बढ्यो चहलपहल

धरान । गत एक महिना देखि लकडाउन घोषणा गरिएको सुनसरीमा शुक्रबार देखि बजारमा चहलपहल शुरु भएको छ ।

शुक्रबार देखि लकडाउन खुकुलो बनाए पछि बजारमा चहलपहल शुरु भएको हो । सुनसरी जिल्ला प्रशासन कार्यालयले समय सिमा तोकेर बजार, पसल खुल्ला गरिदिए पछि बजारमा व्यापारी, उपभोक्ताहरुको चहलपहल शुरु भएको छ । प्रशासनले यसअघि जेठ ३१ गतेसम्म निषेधाज्ञा थप गरेको थियो ।

प्रशासनले स्वास्थ्य मापदण्ड अपनाएर बिहान १० बजे देखि ३ बजे सम्म पसल खुल्ला गरिदिएको छ । सब्जी मण्डी, गुद्री, हाट बजारमा बिक्री वितरणमा रोक लगाए पनि खुद्रा व्यवसायीहरुले खुल्ला नै गरेका छन् । एक महिनाको लकडाउनले प्रभावित बनेको व्यापार व्यवसायलाई केही राहत भएको व्यापारीहरु बताउँछन् ।

बजारमा चहलपहल बढे सँगै संक्रमणको जोखिम पनि बढ्दै गएको छ । प्रशासनले लागु गरेको स्वास्थ्य मापदण्ड पुर्ण रुपमा पालना गर्न चुनौती देखिएको छ । पसलहरुमा स्वास्थ्य सामग्रीहरु व्यवस्थापन गरिएको पाइन्दैन् ।