धरान । पदाधिकारीहरु बिच विवाद बढ्दै गए पछि नेपाली कांग्रेस बेलायतभित्र मनमुटाव शुरु भएको छ ।
कार्यवाहक सभापति महेश दाहालले सभापति युवराज गुरुङको अनुपस्थितिमा अधिवेशनको मिति तय गरेपछि बेलायत काँग्रेसभित्र मनमुटाव बढेको हो । बेलायत कांग्रेस सभापति नेपालमा कोरोना संक्रमित भई उपचारार्थ रहेको अवस्थामा कार्यवाहक सभापति दाहालले आगामी जुलाईमा अधिवेशन गर्ने जुम मिटिङद्वारा निर्णय गरेर संचार माध्यममा समाचार छापिएपछि बेलायत काँग्रेसभित्र पदाधिकारीबीच नै मनमुटाव बढेको छ ।
उपसभापति युवराज सिंहले प्रेस विज्ञप्ती प्रकाशित गरी सभापतिको उपस्थिति बिना कार्यवाहक सभापति दाहालले अधिवेशन तोक्नु पार्टी विधान विपरीत भएको भन्दै निर्णय मान्य नभएको बताएका छन् । उनले दाहालले मनोमानी ढंगले निर्णय गर्दा संगठनको गरिमा घट्ने मात्र हैन यसरी मनोमानी ढंगले गरेको निर्णय मान्य नहुने विज्ञप्तीमा उल्लेख गरेका छन् । उनले विज्ञप्तीमा सभापति गुरुङ र उनका परिवारको शीघ्र स्वास्थ्यको लाभ समेत गरेका छन् ।