विराटनगर । कोरोना संक्रमित उपचार गर्न मोरङको उर्लाबारी नगरपालिकाले ११ बेडको कोभिड उपचार केन्द्र तयार गरेको छ ।
नगरवासीको स्वास्थ्य सुरक्षालाई ध्याना राख्दै निर्माण थालिएको नगरपालिकाका मेयर खड्ग फागोले बताएका छन् ।
जेठ १ गतेदेखि सेवा प्रदान गर्ने उद्देश्यसाथ उर्लाबारी–८ स्थित राजघाटमा रहेको स्वास्थ्य चौकीमा आईसोलेसन बनाइएको हो ।
यसअघि नगरपालिकाले उर्लाबारी–३ मंगबारेमा रहेको प्रदेशस्तरीय मदन भण्डारी अस्पताल तथा ट्रमा सेन्टरमा कोभिड अस्पताल संचालनको लागि पहल गरेको थियो । अस्पतालको इमरजेन्सी वार्डको भवनमा कोभिड अस्पताल सुरु गर्ने भनिएपनि सञ्चालक समिति र अस्पतालका कर्मचारीले असहयोग गरेपछि संचालन हुन सकेको थिएन ।
मेयर फागोले भने,“कोरोनाको दोस्रो लहरको संक्रमण अधिक गतिमा भईरहेको छ । नगरबासी उपचार नपाएर समस्या नहोस भनेर हामीले आफ्नै आईसोलेसन तयार गरेका हौं ।” उर्लाबारीमा हालसम्म दोस्रो लहरका कारण संक्रमित बनेका ७ जनाको मृत्यु भइसकेको छ । संक्रमणको दर दैनिक उकालो लाग्दो छ ।