एन्टीबायोटिकको बोतलमा रेम्डेसिभिरको लेबल लगाएर बिक्री गर्ने पक्राउ

विराटनगर । विराटनगरमा नक्कली रेम्डेसिभिर औषधि बिक्री गर्ने गिरोहलाई प्रहरीले पक्राउ गरेको छ । अति नै जोखिमपूर्ण अवस्थामा आईसियू र भेनिटलेटरमा राखेर उपचार गर्नुपर्ने संक्रमितलाई यो औषधि चलाइन्छ । तर, महामारीका बेला जीवनदायी मानिने औषधिलाई नै नक्कली खोल हालेर गिरोहले बिक्री गर्ने गरेको पाइएको हो ।

जिल्ला प्रहरी कार्यालय मोरङका अनुसार रु. ९० पर्ने ‘स्टासेफ’ नामक इन्जेक्सनमा नयाँ लेबल लगाएर गिरोहले रेम्डेसिभिरको नाममा बिक्री गर्ने गरेको खुलेको हो । उनीहरुले ७ हजार देखि २५ हजार रुपैयाँसम्म नक्कली औषधि बिक्री गर्ने गरेको प्रहरी अनुसन्धानबाट खुलेको छ ।

१ नम्बर प्रदेश प्रहरी कार्यालय विराटनरको विशेष प्रहरीको टोली र मोरङ प्रहरीले नक्कली औषधी विक्री वितरण गरेको आरोपमा विराटनगर–४ नोबेल टिचिङ्गि हस्पिटल अगाडि रहेको ‘साथी फार्मेसीका’ संचालक सोनु आलम र कामदार सरमण यादवलाई पक्राउ गरेको छ ।

उनीहरुले नयाँ लेबल लगाएर रेमडिसिभरको नाममा अर्कै औषधि बिक्री गर्दै आएका थिए ।
जिल्ला प्रहरी कार्यालय मोरङका प्रमुख एसपी सन्तोष खड्काले घटनाबारे अनुसन्धान शुरु गरिएको जानकारी दिएका छन । ‘स्टासेफ’ इन्जेक्सन एन्टिबायोटिक औषधि हो ।

भारतमा प्रतिभाइल रेमडेसिभिर प्रतिभाईल भारू २ हजार ८ सयदेखि ४ हजार ५ सयसम्ममा पाइन्छ । नेपालमा ल्याउँदा १५ हजारदेखि २५ हजार रुपैयाँसम्म पर्छ । आलम यसअघि पनि औषधिको तस्करीमा संलग्न थिए ।