मोटरसाईकल चोरेर गाउँ लैजाने पक्राउ

इलाम/ तराईका विभिन्न जिल्लाबाट मोटरसाईकल चोरी गरी गाउँमा लैजाने गिरोहलाई प्रहरीले पक्राउ गरेको छ ।
प्रदेशका झापा, मोरङ लगायतका स्थानबाट मोटरसाईकल चोरी गरी इलामका ग्रामिण क्षेत्रमा ल्याउने गिरोहलाई जिल्ला प्रहरी कार्यालय इलामले पक्राउ गरेको हो । तराईको विभिन्न जिल्लाबाट चोरी गरी इलामको ग्रामिण भेगहरुमा चलाई रहेको अवस्थामा फेला पारी पक्राउ गरेको जिल्ला प्रहरी कार्यालय इलामले जनाएको छ ।

प्रहरी कार्यालयका अनुसार बैशाख महिनामा मात्र प्रहरीले सात वटा चोरीका मोटरसाईकलहरु सहित चोरी गर्ने ब्यक्तिलाई पक्राउ गरेको छ । पक्राउ पर्नेमा जिल्ला गुल्मी मुसिकोट नगरपालिका ४ घर भई हाल जिल्ला झापा दमक नगरपालिका ५ हरीओम कोलिनि टोल बस्ने हसाङ मगर र जिल्ला ताप्लेजुङ त्रिबेणी गाँउपालिका २ घर भई जिल्ला झापा दमक नगरपालिका ५ हरीओम कोलिनि टोल बस्ने आकाश लिम्बु रहेको जिल्ला प्रहरी कार्यालय इलामका सूचना अधिकारी प्रहरी नायव उपरिक्षक लालध्वज सूवेदीले जानकारी दिए । सुवेदीका अनुसार गत १२ गते माई नगरपालिका ४ सुखानीबाट प्रहरीले मोटरसाईकल सहित पक्राउ गरेको हो । पक्राउ परेका व्यक्तिलाई थप अनुसन्धान गरीरहेको प्रहरीको भनाई छ ।

त्यस्तै गरी गत ३ महिनामा २० वटा चोरीका मोटरसाईकलहरु पक्राउ गरेको थियो । पक्राउ गरीएका २० वटा मोटरसाईकलहरु मध्ये ११ वटा आवश्यक कार्वाहीको लागी जिल्ला प्रहरी कार्यालय झापा पठाईएको छ भने ५ वटा आवश्यक कार्वाहीको लागी भन्सार कार्यालय पशुपतिनगर इलाम बुझाईएको सुवेदीले बताए ।

त्यस्तै गरी २ वटा मोटरसाईकल सम्बन्धित धनीलाई जिम्मा दिईएको छ भने २ वटा जिल्ला प्रहरी कार्यालय इलाम राखी अनुसन्धान भई रहेको प्रहरीको भनाई छ । चोरीका मोटरसाईकल खोजतलास गरी पक्राउगर्ने अभियान अन्र्तगत प्रहरीले पक्राउ गरेको हो ।