इटहरी । सुनसरीको धरान र तरहरा बीचमा रहेको चारकोशे जंगलमा विगत एक सातादेखि लागेको आगो अझै नियन्त्रण हुन सकेको छैन । धरानको तीनकुनेबाट सुरू भएको आगो सल्किदै र स्थान परिवर्तन गर्दै तरहरा सम्म आइपुगेको छ । धरान उपमहानगरले तीनकुने परिषरमा बारूण यन्त्र लगाएर आगो नियन्त्रणको प्रयास गरेपनि सीमित क्षेत्रमामात्रै आगो नियन्त्रणमा आएको छ ।
आगो नियन्त्रणका लागि दमकल समयमै नपुग्ने गरेको स्थानीयहरुको गुनासो छ । धरानमा खानेपानी चरम अभाव रहेको दमकलले समयमा पानी भर्न नसक्दा ढिलो भएको हुनसक्ने अनुमान स्थानीयले गरेका छन् । तरहरास्थित पानीपिया लगायतका मुहानबाट पानी लिएर पुगेको धरानस्थित बारूणयन्त्रले तीनकुनेको आगो नियन्त्रणमा लिएको छ । एक सातादेखिको डडेलो नियन्त्रण बाहिर जाँदा चारकोशे हुदै तरहरास्थित मानववस्तीमा समेत खतरा देखिएको छ ।
धरान र तरहराको बीच भागमा पर्ने चारकोशे क्षेत्रमा लागेको आगो यो वर्ष मात्र होइन । वर्षेनी आगलागी तथा डढेलोले बहुमुल्य प्रजातिका जडिबुटी लगायत बोटबिरूवाहरू सखाप भइरहँदा सम्बन्धित निकाय एवम सरोकारवालाहरू भने बेखबर रहदै आएको देखिन्छ । जिल्ला डिभिजन बन कार्यालय सुनसरीका अनुसार स्थानिय स्तरमा रहेका बन कार्यालयहरूले पूर्व सावधानी अपनाउन नसक्दा बर्षेण्नी जंगलमा लागेको डढेलो नियन्त्रण हुन हम्मे हम्मे परेको छ ।
बन कार्यालय सुनसरीका सुचना अधिकृत गोपाल दहालले डढोले नियन्त्रणकालागि जिल्लाका सबै निकायसँग सहकार्य भइरहेको र केही दिनभित्रै सबै क्षेत्रमा नियन्त्रण भइसक्ने बताए । यता चैत बैशाखको महिना त्यसैपनि हावा हुरी र आगलागिको समय भएपनि स्थानीय स्तरमा रहेका निकायहरूले कुनै पूर्व तयारी गरेको देखिएको छैन ।
सुनसरीको धरान , इटहरी उपमहानगर , इनरूवा , दुहबी , बराहक्षेत्र , लगायतका निकायहरूले कुनै स्थानमा आगलागी भए सम्भावित जोखिम कम गर्न कुनै पुर्व तयारी गरेको देखिएको छैन ।