धरान / बालबालिकाहरुलाई पत्रकारिता तर्फ आकर्षित गर्न धरान ८ ले भित्तेपत्रिका लेखन तथा प्रकाशन तालिम सम्पन्न गरेको छ ।
बालबालिका लक्षित कार्यक्रम अन्र्तगत वडामा रहेका बाल क्लबका प्रतिनिधीहरुलाई दुई दिने भित्ते पत्रिका लेखन तथा प्रकाशन तालिम प्रदान गरेको हो । वडामा रहेका ७ वटा बालक्लब र वडा स्तरिय बालसञ्जालबाट सहभागि भएका थिए । तालिममा २८ जना बालबालिकाहरुको सहभागिता रहेको छ ।
उनीहरुलाई कोशीपत्र दैनिकका कार्यकारी सम्पादक दिनेश गजमेरले सहजीकरण गरेका छन् । तालिमको उदघाटन कार्यक्रमका प्रमुख अतिथी बालमैत्री स्थानीय सुशासन समितीका सदस्य लक्ष्मण दासले गरेका थिए । उनले बालबालिकाहरुले पत्रकारिता तर्फ अघि बढ्दै समाज परिवर्तन र वडाको विकाशका कलम चलाउने विश्वास व्यक्त गरे । कार्यक्रम वडा बालबालिका संयोजक सावित्री परियारको सभापतित्वमा सम्पन्न भएको थियो भने कार्यक्रममा वडा सचिव नविन कुमार बस्नेत, बाल संजालकी अध्यक्ष पिया कार्कीको आतिथ्यता रहेको थियो ।
कार्यक्रमकी सभापति परियारले आगामी दिनमा बालबालिकाको क्षेत्रमा थप बजेट विनियोजन गरि उनीहरुको आवश्यकता अनुसारका कार्यक्रमहरु संचालन गरिने प्रतिबद्धता जनाईन् । तालिमको समापन कार्यक्रममा सहभागिको तर्फबाट ल्याबोटरी बाल क्लबकी उपाध्यक्ष सुस्मिता लिम्बुले बाल अधिकार र पत्रकारिता तालिमको थप आयोजना गरिनुपर्ने सुझाव दिईन् ।
उनले यस अघि लिएको तालिमबाट केही अलमलमा परेकाले थप तालिमले भित्तेपत्रिका लेखनमा थप स्पष्ट पार्न मद्दत मिलेको बताईन् । वडाले विगत ४ वर्ष देखि बाल भित्तेपत्रिका लेखन तथा प्रशासन सम्बन्धी तालिम दिदै आएको छ ।