बहुभाषिक कविता गोष्ठी सम्पन्न

धरान/  धरान प्रज्ञा–प्रतिष्ठानको आयोजनामा बिहीबार बहुभाषिक कविता गोष्ठी सम्पन्न भएको छ ।गोष्ठीमा धरानभित्र बोलिने राई–चाम्लिङ, बान्तवा, मेवाहाङ, पुमा, वाम्बुले, लिम्बू, मगर, गुरुङ, तामाङ, सिङसावा, शेर्पा, मैथिली, ताजपुरिया, याक्खा, नेवारलगायतका २२ मातृभाषी कविहरूले मातृभाषामा कविता वाचन गरेका थिए ।
त्यस क्रममा उत्कृष्ट १० मातृभाषी कविलाई छनोट गरिएको थियो ।

उत्कृष्ट कविका रूपमा प्रदीप योङहाङ लिम्बू, योन्जन इन्दु तामाङ, सेम्माङ याक्खा, पानस गुरुङ, निमा पोङ्सुवा सिङसवा, सोमा लिम्बुखिम याक्खा, मिलन चाम्लिङ, अमृत वामबुले राई, मनि राई गोठाले (मेवाहाङ) र बमप्रकाश राई (चाम्लिङ) छानिएका छन् ।

गोष्ठीमा निर्णायकका रूपमा प्राडा टङ्क न्यौपाने, वरिष्ठ कवि बम देवान र मुन्धुमी कवि प्रदीप मेन्याङ्बो थिए । उत्कृष्ट १० लाई जनही ५ हजार रुपैयाँ र प्रमाणपत्र प्रदान गरिएको थियो ।

नगर प्रमुख तिलक राईको प्रमुख आतिथ्यमा सम्पन्न गोष्ठीमा उपमेयर मञ्जु भण्डारी सुवेदी विशेष अतिथि तथा ब्लाष्ट टाइम्सका प्रधान सम्पादक राजकुमार कार्की विशिष्ट अतिथि थिए ।