_1693980289.gif "#")
विराटनगर । नमिता चौधरीले टिकटक खोलिन् । ड्राप्mटमा गइन् अनि त्यहाँ सेभ गरेको लिङ्कमा क्लिक गर्दै चाहिए जति भिडियो खिचिन् । सुनसरीको झुम्काबाट उनी भेडेटारको पाथीभरा पुगेकी थिइन् ।
‘कोरोनाको त्रास र लकडाउनले गर्दा बाहिर घुम्न निस्किएकै थिइनँ’, उनले भनिन्, ‘बल्ल एघार महिनापछि रमाइलो गर्न निस्किएँ ।’ नमिता र उनका चारजना साथीले भेडेटार वरपरका पर्यटकीय क्षेत्र घुमफिर गरेर रमाइलो गरेको सुनाए ।
कोरोना–त्रास कम हुन सुरु भएसँगै प्रदेश १ का पर्यटकीय क्षेत्रमा पुनः आन्तरिक पर्यटकको चहलपहल सुरु हुन थालेको छ । कोरोनाले पूरै ठप्प भएका धार्मिक तथा पर्यटकीय क्षेत्रमा मानिसहरू समूह बनाएर पुग्न थालेका छन् । कतिपय मानिस बिदा मनाउन परिवारसहित घुम्न निस्कन थालेका छन् ।
होटल व्यवसायी सङ्घ भेडेटारका अध्यक्ष जितेन्द्र रुम्दाली राईका अनुसार भेडेटारमा पर्यटकको आउजाउ निक्कै बाक्लिन थालेको छ । अहिले होटलका ५० प्रतिशत जति कोठा भरिन थालेका छन् । भन्छन्, ‘अहिले कोरोनाको सङ्क्रमण घटेपछि पर्यटकीय गतिविधि पनि सुरु भइसकेको छ ।’ उनले कोरोना सङ्क्रमणले पर्यटन व्यवसायमा ठूलो असर गरेको सुनाए ।
भेडेटार कोसी पहाडको चिसो ठाउँ हो । तराईमा उखुम गर्मी सुरु भएपछि अझ धेरै मानिसहरू त्यहाँ घुम्न पुग्छन् । अङ्ग्रेजी नयाँ वर्षमा भेडेटारमा बर्सेनी फुड फेस्टिबल आयोजना गरिएको थियो ।
त्यस बेला प्रशस्त भारतीय पर्यटक आउँथे । यस वर्ष सो फेस्टिबल भने हुन सकेन । ‘यसपल्ट वैशाखलाई लक्ष्य गरेर फेस्टिबल गर्दैछौँ’, रुम्दालीले भने, ‘फेस्टिबलसँगै वरिपरिका पर्यटकीय क्षेत्रको सर्ट टुर प्याकेज पनि समेट्ने तयारी छ ।’ हेलिकोप्टरबाट पाथीभरा र हलेसीसम्म दर्शनार्थी लगिने उनले जनाए । भेडेटारमा आठ वर्षदेखि लगातार फेस्टिबल भइरहेको थियो ।
भेडेटार र यस वरपर पाथीभरा मन्दिर, आत्माघर, नमस्ते झर्ना, नाम्जे होमस्टे जस्ता पर्यटकीय क्षेत्र छन् । त्यसबाहेक तराईमा गर्मी चढेपछि भेडेटारमा विभिन्न संघसंस्थाले कार्यक्रम गर्न उतै आयोजना गर्ने गर्छन ।
