धरानमा पनि मनाइयो शहीद दिवस "धरान नगरपालिकाले गान्दिव श्रेष्ठ र शुसिल कट्टेल शहीद घोषण गर्न पहल गर्ने"

धरानः शहीदहरुको समझनामा प्रत्येक वर्ष माघ १६ गते मनाइदै आइएको शहीद दिवस शुक्रबार आज धरानमा पनि मनाइएको छ ।
प्रजातन्त्रका लागि बलिदान दिएका सहिदहरुको सम्झनामा शुक्रवार धरान उपमहानगरपालिकाले श्रद्धाञ्जली कार्यक्रमको आयोजना गरी सहिद दिवस मनाएको हो ।

शुक्रबार शहीदको अवसर पारेर धरानमा आयोजित कार्यक्रममा प्रदेश १ का सभामुख प्रदीपकुमार भण्डारी ,धरान उपमहानगरपालिकाका मेयर तिलक राई, उपमेयर मञ्जु भण्डारी लागयतले शहीदका तस्वीरमा माल्यापर्ण गरेका थिए ।

कार्यक्रममा बोल्दै प्रदेश सभामुख भण्डारीले नेपाली जनतालाई सार्वभौमसत्ता सम्पन्न नागरिक बनाउन, जहानिया राणा शासन, निरङ्कुश पञ्चायत तथा तानाशाही राजतन्त्र विरुद्धको जनआन्दोलनहरूमा प्राणको आहुती दिएका वीर सपूतहरूको सम्झनामा शहीद दिवस मनाइँदै आएको बताए ।

उनले भने ‘नेपाललाई संघीय लोकतान्त्रीक गणतन्त्रसम्म ल्याइ सार्वभौम बनाउन प्रथम शहिद लखन थापा सहितका शहिदहरुले दिएको बलिदान भुल्न हुँदैन ।’

मेयर तिलक राईले वीर शहीदहरुको संर्घषमय जीवन र बलिदानको गाथा नेपाल र नेपाली रहेसम्म रहन बताए । साथै प्रजातन्त्रकका लागि भएको आन्दोलनका अरू योद्धाहरूको सम्झनामा प्रत्येक वर्ष उपमहानगरपालिकाले शहिद दिवस मनाउदै आएको जीकीर गरे । उनले आन्दोलनको इतिहासमा धरानका गान्दिव श्रेष्ठ, शुसिल कट्टेले पनि प्राणको आहुती दिएकाले उनिहरुलाई शहिद घोषणा गराउन उपमहानगरपालिकाले पहल समेत गर्ने बताए ।

कार्यक्रममा उपस्थीत उपमेयर भण्डारीले पनि बिर शहीदहरु प्रति श्रद्धाञ्जली अपर्ण गर्दै महान सहिदहरु प्रजातन्त्र प्राप्ति, तानाशाही व्यवस्था र निरंकुशता विरुद्ध खेलेको भुमिका समेत स्मरण गरिन ।

उनले भनिन् ‘नागरिक स्वतन्त्रता, जनताका हक अधिकार सुनिश्चित गराउन शहिद दिवसले जहिले पनि सम्भना गराउदै आएको छ ।’ मुलुक संघिय लोकतान्त्रिकतथा गणतन्त्रमा प्रवेश गरेको बेला शहिदहरुका परिवारका अवस्थाको बारेमा राज्यले सोधिखोजी गर्नुपर्नेमा उनले जोड दिइन् ।

तत्कालीन राणा शासकले १९९७ सालको माघ १० गते काठमाण्डौं टेकुको पचलीमा शुक्रराज शास्त्रीलाई, धर्मभक्त माथेमा लाई माघ १३ गते सिफलमा र गङ्गालाल श्रेष्ठ एवं दशरथ चन्दलाई माघ १५ गते शोभा भगवतीमा मृत्युदण्ड दिएको थियो ।

निरङ्कुश राणा शासन विरुद्ध प्रजातन्त्रका लागि संघर्षमा उत्रिएका चार शहिद लाई राणा शासकले मृत्युदण्ड दिएको दिनलाई २००७ सालको क्रान्तिले प्रजातन्त्र ल्याएपछि शहिद दिवसको रुपमा मनाउन थालिएको हो ।