_1693980289.gif "#")
धरान । सरकारले ल्याएको आर्थिक नीति र नेपाल राष्ट्र बैंकले ल्याएको मौद्रिक नीतिको विषयमा धरानका होटल व्यवसायी सँग छलफल भएको छ ।
कोरोना संक्रमणका कारण बन्दाबन्दीको समयमा सरकारको आर्थिक नितीबाट होटल व्यवसायी पाउने राहत र कर्जाका विषयमा छलफल भएको हो । होटल व्यवसायी समिति धरानले आयोजना गरेको छलफलमा बैंकबाट ऋण लिएर व्यवसाय गरेका व्यवसायीहरुलाई परेको मार्का र त्यसबाट सहजता पाउने विषयमा व्यवसायीहरुले छलफल चलाएका थिए ।
प्राइम कमर्सियल बैंकका प्रदेश नं. १ का प्रमुख दिमन श्रेष्ठले व्यवसायीका हितमा राष्ट्र बैंकले ल्याएका पुनर्कर्जा, कर्जा समायोजन, व्याज अनुदान, बिना धितो पाइने कर्जाका विषयमा जानकारी गराएका थिए । उनले राष्ट्र बैंकको नीति अनुसार सबै बित्तिय संस्थाहरुले एउटै नियम अनुसार कार्य गर्नुपर्ने बताए । बैंकहरुले आफू खुसी थप ऋण निकाशा गरेर बैंकको ऋण र व्याज असुल गर्नु कानुनतः सही हुन नसक्ने उनले बताए ।
उनले भने, ‘बैंकले जहिले पनि ऋणीको अवस्था राम्रो होस् भन्ने नै सोच्ने भएकोले आफूलाई परेको समस्याका बारेमा आफूले कारोबार गरेको बैंकसंग छलफल गर्न आग्रह गर्दछु ।’
समितिका अध्यक्ष मनोजकुमार मेन्याङ्बोले विश्व पर्यटन दिवसको अवसर पारेर स्थानीय पर्यटन व्यवसायीको आर्थिक हितका लागि यो कार्यक्रम गरेको बताएका थिए । कार्यक्रममा धरानका होटल व्यवसायीहरुले राहतहरुमा के–कस्तो लाभ लिन सक्छन् भन्ने विषयमा अनुशिक्षण कार्यक्रम आयोजना गरिएको थियो ।
