_1693980289.gif "#")
धरान/ धरानस्थित धरान मेघा हिमालयन कलेजले राष्ट्रिय परीक्षा बोर्डद्वारा हालै प्रकाशित कक्षा_१२ को नतिजामा ए प्लस (A+) ग्रेड प्राप्त गर्ने १३ जना विद्यार्थीलाई सोमबार कलेज प्राङ्गणमा आयोजित एक कार्यक्रममार्फत सम्मान गरेको छ।
कलेजका अनुसार ए प्लस प्राप्त गर्ने १३ जना विद्यार्थीमध्ये ९ जना विज्ञान संकाय, ३ जना व्यवस्थापन संकाय र १ जना होटल व्यवस्थापन संकायका रहेका छन्।
सम्मान कार्यक्रममा ए प्लस प्राप्त गर्ने अधिकांश विद्यार्थी उच्च शिक्षा अध्ययन तथा इन्जिनियरिङ र चिकित्सा शिक्षाको तयारीका लागि विभिन्न स्थानमा रहेकाले उनीहरूका अभिभावक उपस्थित भएका थिए। अभिभावकहरूले आफ्ना छोराछोरीको तर्फबाट सम्मान ग्रहण गरेका थिए।
कलेजका अध्यक्ष राजेश बिद्रोही, शैक्षिक निर्देशक अर्जुन घिमिरे तथा शिक्षकहरू देवराज रेग्मी र प्रमोद श्रेष्ठलगायतले खादा, अबिर र सम्मानपत्र प्रदान गर्दै विद्यार्थी तथा अभिभावकलाई सम्मान गरेका थिए।
कार्यक्रममा बोल्दै अध्यक्ष बिद्रोहीले उत्कृष्ट नतिजा हासिल गराउन योगदान पुर्याउने सम्पूर्ण शिक्षकप्रति धन्यवाद व्यक्त गर्दै सफल विद्यार्थी तथा अभिभावकलाई बधाई दिएका थिए।
गुणस्तरीय शिक्षासँगै अतिरिक्त क्रियाकलापलाई प्राथमिकता दिँदै आएकाले कलेजप्रति विद्यार्थी र अभिभावकको आकर्षण बढ्दै गएको उनको भनाइ थियो।
उनले आगामी दिनमा पनि शैक्षिक गुणस्तर अभिवृद्धिका लागि अझ प्रभावकारी र सशक्त ढङ्गले काम गर्ने प्रतिबद्धता व्यक्त गरे।
