_1693980289.gif "#")
धरान/ निजी तथा आवासीय विद्यालयहरूको छाता सङ्गठन प्याप्सन र एन–प्याप्सनले आफ्ना मागहरू सम्बोधन नभए धरानका सम्पूर्ण निजी विद्यालय बन्द गर्नेसम्मको आन्दोलनमा उत्रिने चेतावनी दिएका छन्।
सोमबार साँझ आयोजित पत्रकार सम्मेलनमा सङ्गठनका प्रतिनिधिहरूले वर्तमान अवस्था यथावत् रहे चरणबद्ध आन्दोलनका कार्यक्रम सार्वजनिक गर्दै विद्यालय बन्दसम्मको निर्णय लिन सकिने बताएका हुन्।
पत्रकार सम्मेलनमा प्याप्सन अध्यक्ष दीपक घिमिरे र एन–प्याप्सन अध्यक्ष भगत लिम्बूले आफूहरू आबद्ध विद्यालयले तोकिएकोभन्दा बढी शुल्क लिएको प्रमाणित भए कानुनअनुसारको कारबाही भोग्न तयार रहेको स्पष्ट पारे।
साथै, अन्य विद्यालयहरूले समेत बढी शुल्क असुली गरेको पुष्टि भए आवश्यक कारबाही हुनुपर्नेमा जोड दिए।
उनीहरूले केही संस्था र व्यक्तिहरूले सीमित अभिभावकलाई अघि सारेर निजी विद्यालयको बदनाम गर्ने प्रयास गरेको आरोप लगाउँदै निजी क्षेत्रलाई मात्र लक्षित गरी दबाब सिर्जना गर्ने र एकपक्षीय दोषारोपण गर्ने कार्य स्वीकार्य नहुने बताएका छन्।
सङ्गठनले धरान उपमहानगरपालिकाको शिक्षा महाशाखामा कार्यरत अधिकृत चन्द्रकुमारी राई र सञ्जीता धमलामाथि कारबाहीको माग गर्दै ‘नेचर क्लब’को वैधानिकता, उद्देश्य र कार्यविधिबारे समेत प्रश्न उठाएको छ।
सामाजिक सञ्जालमा सार्वजनिक गरिएका शुल्कसम्बन्धी बिलहरूबारे विद्यालय सञ्चालकहरूले अधिकांश कागजात वार्षिक शुल्कका विवरण भएको तथा कतिपय अवस्थामा अभिभावकलाई जानकारी दिन तयार गरिएको रफ हिसाब–किताबलाई नै बिलका रूपमा प्रचार गरिएको दाबी गरेका छन्।
शुल्क विवादको समाधान तथ्य, प्रमाण र संवादका आधारमा हुनुपर्नेमा जोड दिँदै उनीहरूले शिक्षा क्षेत्रलाई अनावश्यक विवादमा नतान्न सरोकारवालासँग आग्रह गरेका छन्।
