धरान । कोरोना संक्रमण समुदाय स्तरमै देखिन थाले पछि धरान उपमहानगरपालिकाले जोखिम न्युनिकरणका लागि अत्यावश्यक वस्तुको पसल मात्रै खोल्ने गरि समयतालिका दिएको छ ।
विहिबार उपमहानगरपालिकामा बसेको सर्वपक्षीय छलफलमा संक्रमणको जोखिम न्युनीकरण गर्न बिहान ९ बजेदेखि ५ बजेसम्म अत्यावश्यक वस्तुको पसल मात्र खोल्न दिने निर्णय भएको छ । अत्यावश्यक वस्तुअन्र्तगत खाद्यान्न, तरकारी र औषधीको पसल मात्र खोल्न दिइने निर्णय भएको हो । होटलहरुले प्याकिंङ गरेर बिक्री गर्न दिने तर होटल, रेष्टुरेष्टमा नै बसेर खान नदिने पनि निर्णय भएको छ ।
बैठकले कोरोना विरामी ओसार पासार गर्ने एम्बुलेन्स र मृत्यु भएकाको शव लैजाने वहान व्यवस्थापन गर्न भोली ११ बजे एम्बुलेन्सवाला र शववाहन चलाउने संस्थाको संयुक्त वैठक बोलाइने भएको छ ।
यस्तै, सार्वजनिक सवारीहरुलाई सरकारले तोकेको मापदण्ड पुरा गरेर मात्र चलाउन दिने र अनुगमन नियमित गर्ने पनि निर्णय भएको छ ।
निर्णय शुक्रबार देखि लागु हुने उपमहानगरपालिकाले जनाएको छ । प्रमुख जिल्ला अधिकारी, प्रहरी प्रमुख, चिकित्सक, राजनीतिक दल सहितको उपमहानगरपालिकाका पदाधिकारीहरुको बैठकमा उपस्थिती रहेको थियो ।