विराटनगर । धान दिवसको अवसरमा मोरङको विराटनगर महानगरपालिका वडा नम्बर १९ मा सामूहिक रोपाईं गरिएको छ ।
महानगरपालिकाका मेयर भीम पराजुलीले रापाईं गरेर धान दिवसको शुभारम्भ गरेका थिए । पराजुलीले भने,“प्रमुख बालीको रुपमा धानखेती नै भएकोले पनि असार १५ को विशेष महत्व छ ।” उनले किसानले मानो रोपेर मुरी फलाउने भनाइलाई सार्थक गर्ने महिना नै असार भएको बताए ।
महानगरकी उपमेयर इन्दिरा कार्की, महानगरका प्रमुख प्रशासकीय अधिकृत इन्द्रमणी पोखरेल,कर्मचारी तथा स्थानीयले खेतका गह्रामा पसेर सामूहिक रोपाईं र रमाइलो गर्दै विराटनगरमा धान दिवस मनाएका छन् ।
खापटोलका स्थानीयवासीले उत्साहसाथ रोपाईंमा साथ दिएका थिए । उनीहरुले खेतीको लागि महानगरले मलखाद जस्ता महत्वपूर्ण वस्तुमा सहयोग गर्नुपर्ने माग गरेका छन् । हरियाली कृषक समूहले खापटोलमा धान दिवस कार्यक्रमको संयोजन गरेको थियो ।
