यातायात मजुदर संगठनको ४१ औं वार्षिकोत्सवमा रक्तदान

धरान । लकडाउनका कारण रक्तदान कार्यक्रमहरु हुन नसक्दा धरान स्थित वीपी कोइराला स्वास्थ्य विज्ञान प्रतिष्ठानमा रहेको ब्लड बैंकमा रगतको अभाव भइरहँदा यातायात मजदुरहरुले रक्तदान कार्यक्रमको आयोजना गरेका छन् ।

नेपाल यातायात स्वतन्त्र मजदुर संगठन धरान नगर समितीले मंगलबार धरान स्थित लोकतान्त्रीक चौतारीमा रक्तदान कार्यक्रम आयोजना गरेको हो ।

संगठननको ४१ औं वार्षिकोत्सवको अवसरमा आयोजना गरेको रक्तदान कार्यक्रममा १ सय १३ पिन्ट रगत संकलन भएको छ ।

नेपाल रेडक्रस सोसाइटी सुनसरीको प्राविधिक सहयोगमा भएको रक्तदान कार्यक्रममा यातायात मजदुरहरु सहित धरानका स्थानीय, विद्यार्थीहरुले रक्तदान गरेका थिए ।

लकडाउनको समयमा संगठनले यातायात मजदुर लाई राहत स्वरुप खाद्यान्न वितरण गर्दै आएको छ, यसै बिच वार्षिकोत्सवको अवसरमा रक्तदान कार्यक्रम पनि गरेको संगठनका नगर समिती अध्यक्ष कमल भट्टराईले बताए ।

उनका अनुसार रक्तदान कार्यक्रम पश्चात वार्षिकोत्सवकै अवसरमा २५ हजार मुल्य बराबरको ३० जना यातायात मजदुरहरुलाई खाद्यान्न सामग्री पनि वितरण गरिएको छ ।

खाद्यान्न सहयोग इटहरी स्थित कामधेनु दुग्ध सहकारी संस्थाले सहयोग गरेको उनले बताए ।

रक्तदान कार्यक्रमको प्रमुख अतिथी संगठनका केन्द्रिय सदस्य लक्ष्मी बाँनिया रहेका थिए भने नेकपा धरानका इन्चार्ज चोत्लुङ, नगरअध्यक्ष नारायण सुवेदी, नेपाल यातायात व्यवसायी राष्ट्रिय महासंघ प्रदेश नम्बर १ का संयोजक सरोज श्रेष्ठ लगायतले शुभकामना दिएका थिए ।