लकडाउन जेठभर लम्बियो, हवाइ उडान असार १६ गतेसम्म बन्द

काठमाडौं । कोरोना भाइरस संक्रमणप्रति सतर्कता अपनाउन मुलुकमा लगाइएको लकडाउन जेठ मसान्तसम्म लम्बिएको छ ।

सरकारले लकडाउन जेठ ३२ गतेसम्म कायम राख्ने निर्णय गरेको छ । मन्त्रिपरिषदको शनिबार बसेको बैठकले लकडाउन फेरि १२ दिन थप्ने निर्णय गरेको हो ।

मन्त्रिपरिषदले राष्ट्रिय तथा अन्तर्राष्ट्रिय हवाइ उडान असार १६ गतेसम्म बन्द राख्ने निर्णय गरेको छ ।

कोरोना भाइरसप्रति सतर्कता अपनाउन सरकारले शुरूमा चैत ११ गते एक साताको लागि लकडाउन घोषणा गरेको थियो । त्यसपछि विभिन्न चरणमा थप गर्दै लगेको हो ।

सरकारले यसअघि लकडाउन जेठ २० गतेसम्म कायम राख्ने निर्णय गरेको थियोे । लकडाउनको म्याद सकिनु २ दिन अगावै फेरि त्यसलाई लम्ब्याउने निर्णय गरेको हो ।

नेपालमा पछिल्लो समय कोरोना संक्रमितको संख्या अप्रत्याशित रूपमा बढिरहेको छ । मुलुकमा संक्रमित शनिबार साँझसम्म १ हजार ४ सय १ पुगेका छन् । त्यस मध्ये २ सय १९ जना भने कोरोनालाई जितेर अस्पताल घर फर्किएका छन् । अहिलेसम्म कोरोनाकै कारण ६ जनाले जीवन गुमाएका छन् ।