प्रथम गायिका रानुदेवीको निधन

विराटनगर । रेडियो नेपालकी प्रथम गायिका रानुदेवी (रानु अधिकारी) को निधन भएको छ ।

८३ वर्षीया रानुदेवी अल्जाइमर्स र पार्किन्सन्स रोगबाट पीडित थिइन ।

उनी केही समयअघि मात्र अमेरिकाबाट काठमाडौ फर्किएकी थिइन । छोरा अविन अधिकारीसंग उनी केही समय अमेरिकामा बसेकी थिइन ।

रानुदेवीका जेठी छोरी र छोरा अमेरिकामा बस्दै आएका छन् । अधिकारीको काठमाडौंस्थित केएमसी अस्पतालमा गएराति निधन भएको हो ।

कांग्रेस नेतृ मृदुला कोइरालाले अधिकारीका छोरा अविनले अमेरिकाबाट आमाको निधन भएको सन्देश पठाएको जानकारी दिएकी छन ।

२००७ सालमा स्व. तारिणी प्रसाद कोइरालाले विराटनगरमा स्थापना गरेको रेडियो नेपालबाट क्रान्तिको गीत गाउने गायिकाको रुपमा रानुदेवी परिचित छिन् ।

उनलाई रेडियो नेपालकी प्रथम महिला गायिका पनि भनिन्छ ।

न्यूयोर्कमा रहँदा रानुदेवी अक्सर आफ्नो घरमा आउने गरेको स्मरण गर्दे कोइरालाले भनिन्,‘‘न्यूयोर्कमा मलाई भेट्न मेरो घर आउनु हुन्थ्यो । साई भक्त हुनु हुन्थ्यो ।

मिठो भजन गाउनुहुन्थ्यो । हाम्रो अनुरोधलाई कहिल्यै नकार्नु भएन भनेपछि भजन सुनाउनु हुन्थ्यो ।’’
अधिकारी नेपाली कांग्रेसकी नेतृ स्व. नोना कोइरालाकी बहिनी हुन ।

२०३६ सालको शिक्षक आन्दोलनमा जेल परेकी रानुदेवी जनआन्दोलनपछि केही समय नेपाल महिला संघ मोरङको अध्यक्षको जिम्मेवारीमा थिइन । अधिकारी आदर्श बालिका विद्यालय विराटनगरमा अध्यापन गर्थिन ।