धरान/ धरानमा प्रहरीले लागूऔषध ब्राउन सुगरसहित तीन जनालाई पक्राउ गरेको छ।
पक्राउ पर्नेमा धरान उपमहानगरपालिका–६ का ३१ वर्षीय नरबहादुर कटुवाल, वडा नं. १ का २६ वर्षीय रवि साह र वडा नं. १५ का ३३ वर्षीय बालकृष्ण दाहाल रहेका छन्।
कोशी प्रदेश प्रहरी कार्यालय विराटनगरको पीआईटी र अस्थायी प्रहरी चौकी तिनकुने धरानबाट संयुक्त रूपमा खटिएको प्रहरी टोलीले उनीहरूलाई धरान–१५ भानुमार्गमा चेकजाँच गर्ने क्रममा लागूऔषध फेला पारेको हो।
प्रहरीका अनुसार मिति २०८३ मंसिर २४ गते दिउँसो ३ः२० बजे पानबारीबाट महादेव चोकतर्फ पैदल आउँदै गरेका उनीहरूलाई शंका लागेर खानतलासी गर्दा ब्राउन सुगर ०.२१ ग्राम, स्पास्मो–प्रोक्सिभोन प्लस ८५४ पिस र नाइट्राजेपाम २० पिस ट्याब्लेट बरामद भएको थियो।
बरामद लागूऔषधसहित तीनै जनालाई नियन्त्रणमा लिएर इलाका प्रहरी कार्यालय धरानमा राखिएको छ।
घटनाबारे थप अनुसन्धान भइरहेको प्रहरीले जनाएको छ।
