विराटनगर/मोरङमा रड प्रहार गरी श्रीमानको हत्या गरेको आरोपमा मृतककी श्रीमतीसहित दुई जना पक्राउ परेका छन्।
मोरङको जहदा गाउँपालिका–२ मोहनपुरमा आईतबार राति करिब ९ बजे ४० वर्षीय बुधराम सोरेनको रड प्रहार गरी हत्या भएको हो।
प्रहरीका अनुसार सोरेनकी ३५ वर्षीया श्रीमती कमली बास्के र भारतको बिहारका २७ वर्षीय सुनिल मिश्रले मिलेर उनको टाउकोमा रड प्रहार गरेका थिए।
रड प्रहारबाट सोरेनको घटनास्थलमै मृत्यु भएको प्रहरीले जनाएको छ।
घटनाको जानकारी पाएलगत्तै पुगेको प्रहरी टोलीले घटनामा प्रयोग भएको रडसहित सुनिल मिश्रलाई नियन्त्रणमा लिएको थियो।
घटनापछि फरार रहेकी कमली बास्केलाई भने साेमबार (आज) बिहान करिब साढे ७ बजे खेतमा भाग्दै गरेको अवस्थामा पक्राउ गरिएको प्रहरीले जनाएको छ।
पक्राउ परेका दुवै जनालाई थप अनुसन्धान तथा कानुनी कारबाहीका लागि इलाका प्रहरी कार्यालय रानीमा राखिएको छ। घटनाबारे प्रहरीले थप अनुसन्धान गरिरहेको छ।
