धरान/लामो समयपछि धरानको पुरानो नाट्य संस्था अनाम नाट्य जमात ‘अनाम रंगमञ्च’का रूपमा पुनः सक्रिय भएको छ ।
पुनरागमनसँगै रंगमञ्चले समाजका समसामयिक समस्या, नागरिकका पीडा र नेतृत्वप्रतिको असन्तुष्टिलाई समेटेर ‘देश खोजिरहेछु’ नाटक मञ्चन गर्ने तयारी गरेको छ ।
विसं २०४४ चैत २२ गते स्थापना भएको अनाम रंगमञ्चले यही असोज २८ गते बुधबार धरानस्थित हरियाली सामुदायिक भवनमा नाटक मञ्चन गर्ने भएको हो । नाटक दैनिक दिउँसो ४ बजे एक सो मात्र प्रदर्शन गरिने आयोजकले जनाएको छ ।
नाटकबारे जानकारी दिन आयोजित पत्रकार सम्मेलनमा रंगमञ्चले कलामार्फत समाजका समस्यामाथि बहस सिर्जना गर्ने उद्देश्य रहेको बताएको छ ।
अनाम रंगमञ्चका अध्यक्ष विजय संयोक सुब्बाका अनुसार नाटकले किसानका समस्या, युवाका अधुरा सपना, बेरोजगारी, वैदेशिक रोजगारीमा जान बाध्य युवाको पीडा, सेवाग्राहीले भोग्नुपर्ने सास्ती, कर्मचारीतन्त्रका जटिलता र नेतृत्वप्रति नागरिकमा देखिएको असन्तुष्टिलाई उजागर गर्नेछ ।
समाजमा विद्यमान विकृति र विसंगतिलाई समेत नाटकमा समेटिएको उनले जानकारी दिए ।
याक्थुङ चलचित्रकर्मी संघ नेपालको सहकार्यमा तयार भएको नाटक सुब्बाकै लेखन तथा निर्देशनमा मञ्चन हुन लागेको हो ।
नाटकले कुनै व्यक्ति वा पक्षलाई दोषी ठहर गर्नुभन्दा पनि समाजमा रहेका समस्यामाथि प्रश्न उठाउँदै दर्शकलाई आफ्नो अवस्था र जिम्मेवारीबारे सोच्न प्रेरित गर्ने निर्देशक सुब्बाले बताए ।
नाटकमा शारदा शाक्य, कुलचन्द्र नेउपाने, कृष्ण तिम्सिना, सुजाता राई, स्वच्छता योगी र सत्कर्म योगीले अभिनय गर्नेछन् ।
अनाम रंगमञ्चको पुनरागमनलाई आयोजकले नाटक मञ्चनमा मात्र सीमित नभई नयाँ पुस्तालाई रंगकर्मसँग जोड्ने र सामाजिक विषयमा सिर्जनात्मक बहस अघि बढाउने प्रयासका रूपमा लिएको छ ।
मनोरञ्जनका नयाँ माध्यम विस्तार भइरहे पनि कलाकार र दर्शकबीच प्रत्यक्ष संवाद स्थापित गर्ने रंगमञ्चको महत्व कायमै रहेको उनीहरूको भनाइ छ ।
नागरिकका समस्या, किसानका गुनासा र युवाका अधुरा सपना अझै सम्बोधन हुन नसकेको अवस्थामा ‘देश खोजिरहेछु’ले समाजलाई नयाँ प्रश्न गर्न र सोच्न प्रेरित गर्ने अपेक्षा आयोजकले गरेको छ ।
रंगमञ्चमार्फत नागरिकका आवाजलाई कलाका माध्यमबाट प्रस्तुत गर्दै समाजसँग संवाद गर्ने लक्ष्यसहित अनाम पुनः दर्शकमाझ आउन लागेको हो ।
