धरान/ सुनसरी प्रहरीले धरान र इनरुवाबाट लागूऔषध ब्राउन सुगर सहित चार जनालाई पक्राउ गरेको छ।
धरान उपमहानगरपालिका–१९ गैरीगाउँमा लागूऔषध बिक्री–वितरण भइरहेको सूचनाका आधारमा अस्थायी प्रहरी चौकी तिनकुनेबाट खटिएको टोलीले २३ वर्षीय पुजन श्रेष्ठको घरकोठामा खानतलासी गरेको थियो। त्यसक्रममा उनको कोठाबाट १ ग्राम १३ मिलिग्राम ब्राउन सुगर बरामद भएको प्रहरीले जनाएको छ।
प्रहरीले श्रेष्ठलाई उक्त पदार्थसहित नियन्त्रणमा लिएर इलाका प्रहरी कार्यालय धरानमा ल्याएको छ। घटनाबारे थप अनुसन्धान भइरहेको प्रहरीले जनाएको छ।
यस्तै, इनरुवा नगरपालिका–४ बसचोकस्थित पूर्व–पश्चिम राजमार्गमा पनि प्रहरीले ब्राउन सुगर सहित तीन जनालाई पक्राउ गरेको छ।
लौकहीबाट इनरुवातर्फ पैदल आउँदै गरेका इटहरी उपमहानगरपालिका–१ का २७ वर्षीय सुरज माझी, २० वर्षीय तोरण माझी र ३० वर्षीय मनिस माझीलाई शंका लागेर प्रहरीले चेकजाँच गरेको थियो।
सो क्रममा तोरण माझीको मलद्वारबाट ५ ग्राम ४९० मिलिग्राम ब्राउन सुगर जस्तो देखिने पदार्थ फेला परेको प्रहरीले जनाएको छ।
तीनै जनालाई लागूऔषधसहित नियन्त्रणमा लिएर जिल्ला प्रहरी कार्यालय सुनसरीमा ल्याइएको छ। घटनाबारे थप अनुसन्धान भइरहेको प्रहरीले जनाएको छ।
