धरान/ धरान–१५ स्थित हिबिस्कस इङ्लिस बोर्डिङ स्कुलअन्तर्गतको हिबिस्कस बाल क्लबले विद्यार्थीलाई पढाइसँगै सामाजिक सेवामा जोड्ने उद्देश्यले मन्दिर परिसरमा सरसफाइ कार्यक्रम गरेको छ।
बाल क्लबले आफ्नो मासिक सरसफाइ अभियानअन्तर्गत मंगलबार धरान–८ स्थित शनि मन्दिर र विश्वकर्मा मन्दिर परिसरमा सरसफाइ गरेको हो।
यसअघि क्लबले सडक क्षेत्रलगायत विभिन्न स्थानमा नियमित रूपमा सरसफाइ गर्दै आएको विद्यालयले जनाएको छ।
आगामी बिहीबार असोज १ गते विश्वकर्मा पूजा हुने भएकाले उक्त मन्दिरमा भक्तजनको अत्यधिक भीड हुने भएकाले पनि पूजा अगावै मन्दिर क्षेत्र सफा गरिएको विद्यालयका निर्देशक गंगराम कुलुङ राईले बताए।
विद्यार्थीलाई किताबी ज्ञानमा मात्र सीमित नराखी सामाजिक कार्यमा सहभागी गराउँदै सामाजिकरण र सेवाभावको विकास गराउने उद्देश्यले कार्यक्रम सञ्चालन गरिएको राईले बताए।
हिबिस्कस बाल क्लबले सरसफाइसँगै विभिन्न समयमा विद्यार्थीले आफ्नै खाजा खर्चबाट बचाएको रकम संकलन गरी मानवीय सेवाका कार्यसमेत गर्दै आएको छ।
क्लबले विद्यार्थीको व्यक्तित्व तथा नेतृत्व विकासका लागि विभिन्न अतिरिक्त क्रियाकलापसमेत सञ्चालन गर्दै आएको विद्यालयले जनाएको छ।
