तस्बिर : चन्द्र पन्दाक
ताप्लेजुङ/ ताप्लेजुङको फुङ्लिङ नगरपालिका र फक्ताङ्लुङ गाउँपालिकाको सिमानामा रहेको सिस्ने खोलामा श्रमदानबाट फड्के पुल निर्माण गरिएको छ।
स्थानीय युवाले श्रमदान गरेर सिस्ने खोलामा अस्थायी फड्के पुल निर्माण गरेका हुन्।
फुङ्लिङ नगरपालिका–१०, फुरुम्बु र फक्ताङ्लुङ गाउँपालिका–३, लिङ्खिम जोड्ने गरी सिस्ने खोलामा काठ र बाँसको प्रयोग गरेर स्थानीयले फड्के पुल निर्माण गरेका हुन्।
खोलामा पानीको बहाव घटेसँगै दुईवटा अस्थायी फड्के पुल निर्माण गरिएको लिङ्खिमका स्थानीय क्षितिज लिङ्खिम लिम्बूले जानकारी दिनुभयो।
लिङ्खिम र फुरुम्बु दुवै गाउँका स्थानीयले श्रमदान गरेर अस्थायी पुल निर्माण गरेको लिम्बूले बताउनुभयो। उहाँका अनुसार मोटरसाइकलसमेत आवतजावत गर्न मिल्ने गरी काठ र बाँस बिछ्याएर फड्के पुल निर्माण गरिएको छ।
सिस्ने खोलामा दुई ठाउँमा फड्के पुल निर्माण भएपछि स्थानीयलाई आवतजावत गर्न सहज भएको उहाँले बताउनुभयो।
-गोरखापत्र अनलाइनबाट
