इटहरी/ हर्क साम्पाङ राई नेतृत्वको श्रम संस्कृती पार्टीका इटहरी उपमहानगर सह–सचिव विनय श्रेष्ठले पार्टी परित्याग गरेका छन्।
करिब ७ महिनासम्म संगठन विस्तारमा सक्रिय भूमिका खेलेका श्रेष्ठले नेतृत्वको कार्यशैलीप्रति असन्तुष्टि जनाउँदै पार्टीबाट अलगिएको कोशीपत्रलाइ बताए ।
सामाजिक सञ्जालमार्फत उनले अबदेखि कुनै पनि राजनीतिक दल, संस्था वा संगठनमा आबद्ध नरहने घोषणा गरेका छन्। पार्टीभित्र नीति, सिद्धान्त र अनुशासनमा विचलन देखिएको उल्लेख गर्दै उनले पद तथा जिम्मेवारीबाट पूर्ण रूपमा अलग भएको स्पष्ट पारेका छन्।
श्रेष्ठले आफ्नो कार्यकालमा साथ दिएका साथीहरूप्रति धन्यवाद व्यक्त गर्दै आगामी दिनमा पनि आपसी सम्मान र सद्भाव कायम रहने विश्वास व्यक्त गरेका छन्। साथै, अब स्वतन्त्र नागरिकका रूपमा समाजका बेथिति र गलत प्रवृत्तिविरुद्ध आवाज उठाउने प्रतिबद्धता जनाएका छन्।
उनको बहिर्गमनले स्थानीय तहमा पार्टीभित्र असन्तुष्टि बढ्दो रहेको संकेत गरेको राजनीतिक वृत्तमा चर्चा छ।
