_1693980289.gif "#")
धरान/ वी.पी. कोइराला स्वास्थ्य विज्ञान प्रतिष्ठानले सेवा प्रवाहलाई अझ प्रभावकारी, पारदर्शी र प्रविधिमैत्री बनाउने उद्देश्यसहित सुझाव तथा गुनासो दर्ताका लागि अनलाइन प्रणाली सञ्चालनमा ल्याएको छ।
अब प्रतिष्ठानमा उपचारका लागि आउने सर्वसाधारणदेखि लिएर संस्थाभित्र कार्यरत शिक्षक, कर्मचारी तथा विद्यार्थीले समेत घरमै बसेर मोबाइल वा कम्प्युटरमार्फत सजिलै आफ्ना सुझाव तथा गुनासो राख्न सक्ने भएका छन्।
यसअघि सुझाव तथा गुनासो राख्नका लागि उपकुलपति कार्यालय परिसरमा रहेको योजना तथा अनुगमन महाशाखामा लिखित निवेदन दिनुपर्ने वा हरेक आइतबार दिउँसो ४ देखि ५ बजेसम्म प्रत्यक्ष रूपमा समितिसँग भेटघाट गर्नुपर्ने व्यवस्था थियो।
तर समयसँगै प्रविधिको उपयोग बढाउँदै प्रतिष्ठानले यो प्रक्रियालाई अझ सहज र पहुँचयोग्य बनाउन डिजिटल माध्यमबाट सेवा विस्तार गरेको हो।
नयाँ व्यवस्था अनुसार, प्रयोगकर्ताले प्रतिष्ठानको आधिकारिक वेबसाइटको होमपेजमा राखिएको सम्बन्धित पोर्टलमार्फत “नयाँ गुनासो” विकल्पमा क्लिक गरी आवश्यक विवरण भरेर आफ्नो गुनासो वा सुझाव दर्ता गर्न सक्नेछन्।
यस प्रणालीमा गुनासोसँग सम्बन्धित प्रमाणका रूपमा फोटो वा अन्य कागजात समेत अपलोड गर्न मिल्ने सुविधा उपलब्ध गराइएको छ, जसले गुनासोको विश्वसनीयता र छानबिन प्रक्रियालाई थप सुदृढ बनाउने अपेक्षा गरिएको छ।
यसबाहेक, प्रयोगकर्ताले आफूले दर्ता गरेको गुनासो वा सुझावको अवस्था कहाँसम्म पुग्यो भन्ने जानकारी लिनका लागि ट्र्याकिङ सुविधा पनि समावेश गरिएको छ। यसले गुनासो व्यवस्थापन प्रक्रियामा पारदर्शिता ल्याउने र सेवाग्राहीलाई जानकारीमा राख्ने विश्वास गरिएको छ।
प्रतिष्ठानले गुनासोकर्ता वा सुझावदाताको व्यक्तिगत विवरण पूर्ण रूपमा गोप्य राखिने स्पष्ट व्यवस्था गरेको छ, जसले निडर भएर आफ्ना कुरा राख्न प्रोत्साहन गर्नेछ।
पोर्टल प्रयोगमा सहजता ल्याउनका लागि “अडियो निर्देशन” समेत राखिएको छ, जसले प्रयोगकर्तालाई गुनासो दर्ता गर्ने प्रक्रिया बुझ्न थप सहयोग पुर्याउनेछ। यस माध्यमबाट प्रविधिसँग कम परिचित व्यक्तिहरूले पनि सजिलै सेवा लिन सक्ने अपेक्षा गरिएको छ।
प्रतिष्ठानका प्रवक्ता प्रा.डा. शमशेर श्रेष्ठ का अनुसार, यसरी प्राप्त हुने सुझाव तथा गुनासोलाई सम्बन्धित समितिले गम्भीरतापूर्वक अध्ययन र विश्लेषण गर्नेछ। जायज ठहर भएका विषयहरू उपकुलपतिसमक्ष पेश गरिने र समाधानका लागि आवश्यक कदम चालिने उनले जानकारी दिए।
यो अनलाइन प्रणाली सञ्चालनमा आएपछि प्रतिष्ठानको सेवा सुधारमा नागरिकको प्रत्यक्ष सहभागिता बढ्ने, गुनासो व्यवस्थापन छिटो र व्यवस्थित हुने तथा समग्र स्वास्थ्य सेवा प्रणालीलाई अझ जिम्मेवार र उत्तरदायी बनाउन सहयोग पुग्ने अपेक्षा गरिएको छ।
