धनकुटा/ नेकपा एमालेका केन्द्रीय सदस्य तथा नवनिर्वाचित प्रतिनिधिसभा सदस्य राजेन्द्रकुमार राईले धनकुटाका प्रमुख समस्या समाधानका लागि संसद्मा सक्रिय पहल गर्ने बताएका छन्।
धनकुटामा आयोजित पत्रकार सम्मेलनमा उनले किसानलाई प्रत्यक्ष असर पारिरहेको बाँदर आतङ्क नियन्त्रणको विषयलाई संसद्मा उठाउने प्रतिबद्धता व्यक्त गरे। यसका लागि आवश्यक नीतिगत व्यवस्था र कार्यक्रम ल्याउन आफूले पहल गर्ने उनले बताए।
राईले विवादास्पद मानिएको गाँजा खेतीलाई वैधानिकता दिने विषयमा कानुन संशोधनका लागि पनि पहल गर्ने उल्लेख गरे। यसले ग्रामीण अर्थतन्त्र मजबुत बनाउन सहयोग पुग्ने उनको भनाइ छ।
त्यसैगरी कोशी राजमार्गअन्तर्गत भेडेटार सडकको अधिकार क्षेत्रभित्र पर्ने जग्गाको मुआब्जा सम्बन्धी समस्या समाधानका लागि पनि आफूले संसद्मा आवाज उठाउने बताए। अधुरा तथा अपुरा योजनाहरू पूरा गर्न पनि पहल गर्ने उनको प्रतिबद्धता छ।
उनले बाँझो जमिनको सदुपयोग गर्दै उत्पादन बढाउन जनसङ्ख्या वृद्धि आवश्यक रहेको धारणा पनि राखे।
पत्रकार सम्मेलनको अध्यक्षता नेकपा एमाले धनकुटाका अध्यक्ष शिव आङ्लाले गरेका थिए।
