झापा/ फागुन २१ गते हुने प्रतिनिधिसभा सदस्य निर्वाचन नजिकिँदै जाँदा झापा निर्वाचन क्षेत्र नम्बर १ मा चुनावी सरगर्मी तीव्र बनेको छ।
दलका शीर्ष नेता देखि नयाँ अनुहारसम्म मतदाताको मन जित्न घर–घरमा पुगिरहेका छन्।
भारतसँग सिधा सीमा जोडिएको, व्यापारिक नाका र सामाजिक–वैचारिक विविधता बोकेको झापा–१ यसपटक पनि पूर्वी नेपालको राजनीतिक प्रयोगशालाका रूपमा देखिएको छ। यहाँको नतिजाले केवल स्थानीय प्रतिनिधित्व मात्र होइन, राष्ट्रिय राजनीतिमा समेत सन्देश दिने अपेक्षा गरिएको छ।
मेचीनगर नगरपालिकाका १५ वडा, बुद्धशान्ति गाउँपालिकाका चार वडा र भद्रपुर नगरपालिकाका दुई वडा समेटिएको यस क्षेत्रमा १ लाख ३१ हजार ६७ मतदाता छन्। पुरुष र महिला मतदाताको संख्या झण्डै बराबर हुँदा मतदाताको निर्णयलाई अझ निर्णायक मानिएको छ। भूगोल र जनसंख्याको विविधताले झापा–१ को चुनावलाई सधैं अनिश्चित बनाउँदै आएको छ।
यसपटकको चुनावमा दलगत प्रतिस्पर्धासँगै पेशागत र वैचारिक पहिचान पनि मुख्य मुद्दा बनेको छ। प्राध्यापक, सहकारी अभियन्ता, व्यवसायी, पत्रकार र सामाजिक अभियन्तासम्म उम्मेदवार बनेपछि चुनावी बहस परम्परागत सीमाभन्दा बाहिर गएको देखिन्छ।
नेपाली कांग्रेसका उम्मेदवार केशवराज पाण्डे संगठनात्मक राजनीतिबाट आएका अनुभवी नेता हुन्। कांग्रेस उपसभापति विश्वप्रकाश शर्माको निर्वाचन क्षेत्र भएकाले पनि यहाँको नतिजा कांग्रेसका लागि प्रतिष्ठासँग जोडिएको छ। एमालेका उम्मेदवार रामचन्द्र उप्रेती सहकारी क्षेत्रमा बनाएको सञ्जाललाई आधार बनाएर मतदातामाझ पुगिरहेका छन्।
नेपाली कम्युनिस्ट पार्टीका अशेष घिमिरे वैचारिक राजनीतिमा जोड दिने युवा उम्मेदवारका रूपमा उभिएका छन् भने राष्ट्रिय स्वतन्त्र पार्टीकी निशा डाँगी युवाको प्रतिनिधित्व र वैकल्पिक राजनीतिलाई मुख्य एजेन्डा बनाएर मैदानमा छन्। राष्ट्रिय प्रजातन्त्र पार्टीका हेमराज कार्कीले आर्थिक विकास र रूपान्तरणको बहस अघि सारेका छन्।
यसैगरी श्रम संस्कृति पार्टी, मंगोल नेशनल अर्गनाइजेशनलगायत दलका उम्मेदवार तथा स्वतन्त्र उम्मेदवारहरूले स्थानीय मुद्दा र पहिचानलाई केन्द्रमा राख्दै फरक विकल्प प्रस्तुत गरिरहेका छन्।
१५ उम्मेदवारबीच प्रतिस्पर्धा रहेकाले झापा–१ मा मत विभाजनको सम्भावना उच्च देखिन्छ। संगठनको बल, उम्मेदवारको व्यक्तित्व, अनुभव र नवीन सोचबीचको यो चुनावी भिडन्तमा अन्ततः मतदाताले कसलाई रोज्छन् भन्ने फैसला फागुन २१ गते मतपेटिकामार्फत हुनेछ।
