धरान/ आगामी फागुन २१ गते हुने प्रतिनिधिस भानिर्वाचनको लागि कोशी प्रदेशका १४ वटै जिल्लामा नेपाली सेना परिचालन गरिएको छ। निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गराउने उद्देश्यले सेना परिचालन गरिएको हो ।
नेपाल सरकारको निर्देशन तथा गृह मन्त्रालयबाट जारी ‘एकीकृत निर्वाचन सुरक्षा योजना, २०८२’ अनुरूप आजदेखि प्रदेशभर नेपाली सेनाका फौजहरू परिचालन गरिएको सेनाले जनाएको छ। उक्त योजनाअनुसार सेनाले अन्य सुरक्षा निकायसँग समन्वय गरी नागरिक प्रशासनलाई सहयोग पुर्याउने, संवेदनशील क्षेत्र तथा महत्वपूर्ण पूर्वाधारको सुरक्षा गर्ने, निर्वाचन अवधिमा सम्भावित आपत्कालीन अवस्थाहरूमा शीघ्र प्रतिक्रिया जनाउने तथा मतदाताको निर्वाध आवागमन सुनिश्चित गर्ने जिम्मेवारी पाएको छ।
यसैगरी, निर्वाचन सामग्रीको सुरक्षा तथा सम्भावित जोखिम न्यूनीकरणमा समेत सेनाले सक्रिय भूमिका निर्वाह गर्ने जनाइएको छ। सुरक्षा व्यवस्थालाई थप प्रभावकारी बनाउन निर्वाचनभन्दा एक महिना अगाडिदेखि नै सबै जिल्लामा अस्थायी बेस स्थापना गरी सैनिक गस्ती तथा आवश्यकताअनुसार संयुक्त गस्ती सञ्चालन गरिने तयारी गरिएको छ।
नेपाल प्रहरी र सशस्त्र प्रहरी बलसँगको सहकार्यमा विमानस्थल, कारागारलगायत महत्वपूर्ण संरचनाको सुरक्षा जिम्मेवारी पनि नेपाली सेनाले सम्हाल्नेछ। निर्वाचन अवधिमा शान्ति–सुरक्षा तथा सुव्यवस्था कायम राख्न सर्वसाधारणलाई सबै सुरक्षा निकायसँग सहकार्य गर्न आग्रह समेत गरेको छ।
