_1693980289.gif "#")
धरान/ सुनसरीमा लागूऔषध कारोबार नियन्त्रणका लागि सक्रिय बनेको प्रहरीले दुई फरक स्थानबाट ठूलो परिमाणमा लागूऔषध बरामद गर्दै एक युवकलाई नियन्त्रणमा लिएको छ।
वडा प्रहरी कार्यालय धरानबाट खटिएको प्रहरी टोलीले मिति २०८२/०८/२८ गते दिउँसो करिब २ः४५ बजे धरान उपमहानगरपालिका–१९ धनकुटे रोडमा गस्ती गर्ने क्रममा शंकास्पद रूपमा हिँडिरहेका धरान–१० निवासी १९ वर्षीय निरफुङ बस्नेतलाई नियन्त्रणमा लिएको हो।
कानुनबमोजिम गरिएको चेकजाँच तथा खानतलासीका क्रममा उनको साथबाट लागूऔषध ट्रामाडोल २३० ट्याब्लेट र स्पासपेन २० क्याप्सुल गरी जम्मा २५० थान ट्याब्लेट/क्याप्सुल फेला परेको प्रहरीले जनाएको छ।
बस्नेतलाई लागूऔषधसहित नियन्त्रणमा लिई इलाका प्रहरी कार्यालय धरानमा राखेर थप अनुसन्धान भइरहेको छ।
यस्तै, मिति २०८२/०८/२७ गते राति करिब ९ बजे इनरुवा नगरपालिका–३ महेन्द्रचोक क्षेत्रमा बेवारिसे अवस्थामा सेतो बोरा र कालो झोलामा शंकास्पद वस्तु राखिएको सूचनाका आधारमा जिल्ला प्रहरी कार्यालय सुनसरीबाट खटिएको टोलीले जाँच गर्दा बोरा र झोलाभित्र लागूऔषध गाँजा १० केजी र ब्राउन सुगर २.१८ ग्राम बरामद गरेको छ।
बरामद लागूऔषध कानुनबमोजिम जिल्ला प्रहरी कार्यालय सुनसरीमा राखी थप अनुसन्धान भइरहेको प्रहरीले जनाएको छ।
लागूऔषध नियन्त्रणका लागि नियमित गस्ती र सूचनाका आधारमा कडा निगरानी बढाइएको प्रहरीले बताएको छ।
