फाइल तस्बिर
झापा/ भारतबाट नेपालतर्फ लागुऔषध लुकाइछिपाई ल्याउँदै गरेका एक युवक भद्रपुरमा पक्राउ परेका छन्।
भद्रपुर नगरपालिका–५ मेचिपुल नजिक नियमित गस्तीमा खटिएको वडा प्रहरी कार्यालय भद्रपुरको टोलीले मंसिर ७ गते साँझ करिब ७:४० बजे बिर बहादुर कुमाल (३१), स्थायी ठेगाना अर्जुनधारा नगरपालिका–२ खुदुनाबारीलाई शंका लागि चेकजाँच गर्दा लागुऔषधसहित नियन्त्रणमा लिएको हो।
प्रहरीका अनुसार कुमाल भारतबाट पैदलमार्ग हुँदै नेपाल प्रवेश गर्ने क्रममा थिए। चेकजाँचका क्रममा उनको मलद्वारभित्र प्लास्टिकमा प्याक गरी लुकाएर ल्याइएको ब्राउन सुगर फेला परेको प्रहरीको भनाइ छ।
बरामद पदार्थसहित तौल गर्दा ८ ग्राम ९० मिलिग्राम भेटिएको छ भने प्लास्टिक हटाउँदा शुद्ध तौल ६ ग्राम ८३० मिलिग्राम रहेको प्रहरीले जनाएको छ।
उनीलाई पक्राउ गरी आवश्यक अनुसन्धान तथा कानुनी प्रक्रिया अघि बढाउन जिल्ला प्रहरी कार्यालय झापा पठाइएको प्रहरीले जानकारी दिएको छ।
