विराटनगर/ सुनसरीको धरान–६ बाट लागूऔषधसहित दुई युवकलाई प्रहरीले पक्राउ गरेको छ। लागूऔषध नियन्त्रण अभियानअन्तर्गत धरानसहित झापा र बर्जुमा प्रहरीले चार जनालाई नियन्त्रणमा लिएको हो।
धरान–६ मा रहेको प्रहरी चौकी पानबारीले सोही स्थानका रोशन राई र अभिषेक बिश्वकर्मालाई निषेधित औषधि ट्रामाडोलका २६१ क्याप्सुल र २८४ ट्याब्लेट सहित पक्राउ गरेको जनाएको छ।
यसैबीच, झापाको मेचीनगर नगरपालिका–६ मा इलाका प्रहरी कार्यालय काँकडभिट्टाबाट खटिएको टोलीले कमल गाउँपालिका–३ का प्रज्वल बाँनियालाई ३ ग्राम १३० मिलिग्राम ब्राउन सुगर सहित पक्राउ गरेको छ।
त्यस्तै, सुनसरीको बर्जु गाउँपालिका–३ का मुकेश कुमार चौधरीलाई इलाका प्रहरी कार्यालय दुहबीले १८ किलो ५९८ ग्राम गाँजा सहित नियन्त्रणमा लिएको हो।
प्रहरीका अनुसार सबै पक्राउ परेकाहरूमाथि आवश्यक कानुनी प्रक्रिया र थप अनुसन्धान भईरहेको छ।
