रौतहट । बारामा जङ्गली हात्तीको आकस्मिक आक्रमणबाट एक जनाको मृत्यु भएको छ। पूर्व–पश्चिम राजमार्गअन्तर्गत जितपुरसिमरा उपमहानगरपालिका–१६ काटघाट क्षेत्रमा हात्तीको आक्रमणमा परेर ट्रक चालकको ज्यान गएको हो।
नाः४ ख १८३० नम्बरको ट्रक चलाइरहेका जितपुरसिमरा–१ निवासी अन्दाजी ४० वर्षीय राजकुमार चौधरीलाई हात्तीले आक्रमण गरेपछि घटनास्थलमै मृत्यु भएको जिल्ला प्रहरी कार्यालय बाराले पुष्टि गरेको छ।
प्रहरी निरीक्षक तथा निमित्त प्रवक्ता खेमप्रसाद नेपालका अनुसार ट्रकबाट झरेर बच्न जंगलतर्फ भाग्दै गर्दा करिब सय मिटर दक्षिणतर्फ हात्तीले चौधरीलाई समातेको थियो। हात्तीको आक्रमण अत्यन्त तीव्र भएको र उनलाई तत्कालै उद्धार गर्न नसकिएको प्रहरीले जनाएको छ।
हात्तीले अन्य केही सवारीसाधनमा समेत तोडफोड गरेपछि राजमार्ग केही समय अवरुद्ध बनेको प्रत्यक्षदर्शीहरूले बताएका छन्। अचानक सडकमा पुगेको हात्तीले देख्नेबित्तिकै सवारीसाधनहरूमा आक्रमण गरेको उनीहरूको भनाइ छ।
हात्तीलाई पुनः जंगलतर्फ धपाउने कार्य जारी रहेको प्रहरी कार्यालय बाराले जनाएको छ।
