_1693980289.gif "#")
फाईल तस्बिर
सुनसरी/ मोरङको लेटाङबाट असोज २१ गते बेपत्ता भएकी १३ वर्षीया अंशु गौतमको शव फेला परेको दुई हप्ता पूरा भएको छ। तर प्रहरी अनुसन्धानमा कुनै ठोस प्रगति नदेखिएको कारण स्थानीय समुदाय आक्रोशित र त्रसित बनेका छन्।
अंशुको शव कात्तिक ७ गते बेलबारी–चिसाङ साझेदारी वनको घना जङ्गलमा अत्यन्तै दयनीय अवस्था—टाउको र शरीर छुट्टिएको, कपडा फुकालिएको र शरीरका भागहरू छिन्नभिन्न—मा फेला परेको थियो। घटनास्थल घरबाट करिब साढे ३ किमी दूरीमा पर्छ।
बीपी कोइराला स्वास्थ्य विज्ञान प्रतिष्ठानमा गरिएको पोष्टमार्टम अनुसार टाउकोमा धारिलो हतियारले प्रहार भएको र रगत जमेको पाइएकाले यही मृत्युको मुख्य कारण मानिएको छ।
बलात्कारका विषयमा रिपोर्टले स्पष्ट उल्लेख नगरे पनि नकारिएको पनि छैन। डिएनए परीक्षण नतिजा नआएसम्म यथार्थ पुष्टि हुने छैन।
असोज २१ मा घरबाट बाहिरिएकी अंशु फर्केर नआएपछि परिवारले प्रहरीलाई तुरुन्तै जानकारी गराएका थिए। १८ दिनको खोजतलासपछि मात्र शव फेला परेकोले परिवारको पीडा झनै गहिरिएको छ।
घटनाले लेटाङ–बेलबारी क्षेत्र असुरक्षित रहेको धारणा बढाएको छ। अभिभावकहरू बालबालिका घरबाट एक्लै नपठाउने अवस्थामा पुगेका छन्।
लेटाङ–२ का वडा अध्यक्ष तेजबहादुर तिम्सिनाका अनुसार “अनुसन्धान अझै अन्योलमै छ, अपराधी कसैलाई ठोस प्रमाणसहित समातिएको छैन।”
मोरङका एसपी कवित कटुवाल भन्छन्, “डिएनए रिपोर्ट बाँकी छ। केही समय लागे पनि सत्य बाहिर ल्याइनेछ।”
प्रहरी निरीक्षक राकेश रेग्मीका अनुसार शङ्कास्पद व्यक्तिहरूको बयान, मोबाइल ट्र्याकिङ र फरेन्सिक विश्लेषण जारी रहेको छ।
स्थानीय टिकाराम पौडेल भन्छन्, “राज्यले सुरक्षामा गम्भीर कमजोरी देखाएको छ। यस्तो निर्मम हत्यामा अपराधी तत्काल पत्ता लगाउनैपर्छ।”
अंशुको हत्या घटनाले नेपालमा बढ्दै गएको बालिका हिंसाको अर्को पीडादायी उदाहरण थपेको छ।
शव फेला परेको दुई हप्ता बित्दासमेत दोषी नखुलेपछि न्यायका लागि स्थानीय दबाब झनै चर्किंदै गएको छ।
