मोरङ/ मोरङको जहदा गाउँपालिका–३ मा एम्बुलेन्समार्फत ठूलो परिमाणमा गाँजा ओसार–पोसार हुँदै गरेको छ भन्ने बिशेष सूचनाका आधारमा प्रहरीले बुधबार राति गरेको छापामा ३३ किलोभन्दा बढी गाँजासहित दुई जनालाई नियन्त्रणमा लिएको छ।
लागूऔषध नियन्त्रण ब्युरो विराटनगर र वडा प्रहरी कार्यालय हाटखोलाबाट खटिएको संयुक्त टोलीले स.१ च ६५६ नम्बरको एम्बुलेन्स चेकजाँच गर्ने क्रममा कालो झोलाभित्र लुकाइ–छिपाइ गरिएको ३३ किलो ६१० ग्राम गाँजा फेला पारिएको प्रहरीको प्रारम्भिक जानकारीमा उल्लेख छ।
गाँजा बरामदसँगै एम्बुलेन्स चालक विराटनगर–५ का ३२ वर्षीय दुर्गा प्रसाद राजवंशी र एम्बुलेन्ससँगै सुरक्षा जस्तै गर्दै पछी–पछि आएका को.३१ प ८८८९ नम्बरका मोटरसाइकल चालक जहदा–३ का ३२ वर्षीय दिलिप कुमार राजवंशी दुबै जनालाई प्रहरीले घटनास्थलमै नियन्त्रणमा लिएको हो।
प्रहरीले बरामद गरिएको गाँजा, एम्बुलेन्स र मोटरसाइकलसहित प्रतिवादी दुबै जनाविरुद्ध आवश्यक कानूनी प्रक्रिया अघि बढाइरहेको जनाएको छ।
