धरान/ हाल प्रदर्शनरत नेपाली कथानक चलचित्र ‘परान’ ले देशभरका सिनेमा हलहरूमा दर्शकको मन जित्दै उत्कृष्ठ प्रतिक्रिया बटुलिरहेको छ।
वरिष्ठ कलाकार नीर शाह र मदनकृष्ण श्रेष्ठको जीवन्त अभिनयले सिँगारिएको यो चलचित्रले परिवार, माया र सम्बन्धका गहिरा भावनालाई हृदयस्पर्शी रूपमा प्रस्तुत गरेको छ।
चलचित्र हेरेर दर्शकहरू भावविह्वल बनेको दृश्यहरू अहिले सामाजिक सञ्जालभर भाइरल बनेका छन्। कोही आँसु पुछ्दै निस्किन्छन्, कोहीले त “लामो समयपछि यस्तो नेपाली फिल्मले मन छोयो” भन्दै प्रतिक्रिया दिएका छन्।
‘परान’ मा केकी अधिकारी, पूजा चन्द, महेश त्रिपाठी, प्रविन खतिवडा, यमन श्रेष्ठ, बुद्धि तामाङ र बबिन राईलगायतका कलाकारहरूको सशक्त अभिनयले कथालाई अझ सजीव बनाएको छ।
शेखर गोल्छा र रञ्जित आचार्यको संयुक्त निर्माणमा तयार यो चलचित्रमा शिवराम श्रेष्ठको आकर्षक छायाङ्कन, मित्र डी गुरुङको सशक्त सम्पादन र गगन थापा मगरको मार्मिक संगीतले फिल्मलाई पूर्णता दिएको छ।
