सुनसरी/ चाडपर्वलाई लक्षित गर्दै प्रहरीले धरानमा विशेष सुरक्षा सतर्कता अपनाएको छ।
यात्रुहरूको सुरक्षालाई प्राथमिकता दिँदै कोशी प्रदेश प्रहरी कार्यालय केनाइन शाखा, धरानले शनिबार विशेष ‘डग स्निफिङ’ (कुकुरद्वारा स्क्यानिङ) सहितको संयुक्त चेकिङ अभियान सञ्चालन गरेको हो।
धरान उपमहानगरपालिका–८ तिनकुनेस्थित कोशी लोकमार्ग क्षेत्रमा सञ्चालन गरिएको उक्त चेकिङमा दुईवटा तालिमप्राप्त कुकुर (डग) सहित २० जनाको संयुक्त टोली परिचालन गरिएको थियो।
उक्त टोलीमा इलाका प्रहरी कार्यालय धरान, ट्राफिक प्रहरी र केनाइन शाखा धरानका सुरक्षाकर्मीहरू सहभागी थिए।
प्रहरीका अनुसार चाडपर्वको समयमा यात्रु आवागमन र भीडभाड बढ्ने भएकाले सम्भावित आपराधिक गतिविधि, लागूऔषध ओसारपसार, विस्फोटक पदार्थ तथा अन्य अवैध सामान नियन्त्रणका लागि यो अभियान सञ्चालन गरिएको हो।
केनाइन शाखाका डगहरूद्वारा गरिएको विशेष स्क्यानिङ चेकिङले सुरक्षालाई थप सुदृढ बनाउने र यात्रुहरूमा प्रहरीप्रति विश्वास बढाउने उद्देश्य रहेको प्रहरीको भनाई छ।
