_1693980289.gif "#")
धरान/ धरान उपमहानगरपालिका वडा नं. १४ स्थित विजयपुर क्षेत्र धार्मिक पर्यटन गन्तव्यको रूपमा परिचित छ ।
पिण्डेश्वर, बुढासुब्बा, दन्तकाली, भीमसेन, शनि, पाथीभरा लगायतका मन्दिरहरू रहेको यो क्षेत्र वर्षभरि हजारौँ भक्तजनले दर्शन गर्ने केन्द्र बनेको छ ।
तर, धार्मिक सम्भावनाले भरिपूर्ण यस ठाउँलाई विकास गर्ने लक्ष्य सार्वजनिक गरे पनि स्थानीय सरकारले सरसफाइ र फोहोर व्यवस्थापनजस्ता आधारभूत कुरामा समेत आवश्यक ध्यान नदिएको आरोप स्थानीयवासीले लगाएका छन् ।
विजयपुरलाई धार्मिक पर्यटकीय गन्तव्यका रूपमा विकास गर्ने भन्दै उपमहानगरपालिकाले नीति तथा कार्यक्रममा समेटे पनि व्यवहारमा भने पहल कमजोर देखिएको छ । स्थानीयको भनाइ अनुसार उपमहानगरपालिकाले फोहोर संकलनका लागि हप्तामा एकपटक आउने भनिए पनि कतिपय हप्ता त फोहोर उठाउने टोली नै नदेखिने गरेको छ ।
यसबीच, इटहरीस्थित पृतना कार्यालय अन्तर्गतको भगवती गणका नेपाली सेनाले वडा कार्यालयसँग समन्वय गर्दै विजयपुर क्षेत्र सरसफाइ अभियान सुरू गरेको छ । दुईधारे सडक आसपासको नाली सफाइ तथा झार उखेलेर सेनाले धार्मिक स्थल वरपरको क्षेत्र व्यवस्थित बनाएको धरान उपमहानगरपालिका वडा नं. १४ का वडा सदस्य राम तामाङले बताऐ ।
दन्तकाली मन्दिरका पुजारी कमल भट्टराईले सेनाको पहलको प्रशंसा गर्दै यसलाई निरन्तरता दिनुपर्ने बताउनुभयो । धार्मिक क्षेत्रको महत्व बुझेर सेनाले अग्रसरता लिएको बताए ।
नजिकको देउता हेला भन्ने उखानजस्तै, धरानको शिर मानिने विजयपुरका पवित्र स्थानमा बाह्य संघसंस्थाले देखाएको तत्परताभन्दा स्थानीय सरकार र समुदायको सरोकार कमजोर देखिनु चिन्ताजनक पक्ष हो । धार्मिक पर्यटन प्रवद्र्धनको आधार नै स्वच्छता र व्यवस्थापन हो भन्ने तथ्यलाई राज्य संरचनाले आत्मसात् गर्नुपर्ने आवश्यकता देखिन्छ ।
विजयपुरलाई वास्तविक धार्मिक पर्यटन केन्द्रमा रूपान्तरण गर्न चाहिँ स्थानीय सरकार, समुदाय, धार्मिक मठमन्दिर समिति र सुरक्षासंस्थाबीच दीर्घकालीन समन्वय अनिवार्य छ ।
सरसफाइलाई अभियान होइन, संस्कृतिको रूपमा विकास गर्न सकेमा मात्र विजयपुरको आध्यात्मिक महिमा र पर्यटन सम्भावना उजागर हुन सक्छ ।
