_1693980289.gif "#")
झापामा फेलापरेकि नवजात शिशु अस्पतालमा उपचार हुदै
धरान/सुनसरी र झापाका दुई ठाउँमा फालिएका नवजात शिशुहरू जीवितै फेला परेका छन् । समयमै उद्धार भएपछि दुवै शिशुको स्वास्थ्य अवस्था सामान्य रहेको प्रहरीले जनाएको छ ।
सुनसरीको कोशी गाउँपालिका–८, शर्मा टोलमा शनिबार राति करिब ९ बजे एक नवजात शिशु प्लास्टिकको झोलामा बेरेर फालिएको अवस्थामा स्थानीय विजय कुमार खत्वेले फेला पारेका थिए ।
खत्वेले बच्चा रोएको आवाज सुनेर नजिक पुगेका थिए । घटनास्थलमा पुग्नेबित्तिकै उनले तत्काल इलाका प्रहरी कार्यालय भन्टावारीलाई जानकारी गराए ।
समाचार पाउँदासाथ प्रहरी वरिष्ठ नायब निरीक्षक पुण्यप्रसाद अधिकारीको नेतृत्वमा खटिएको टोली स्थानीयको सहयोगमा पुगेको थियो । टोलीले शिशुलाई उद्धार गरी तुरुन्तै कोशी हेल्थ केयर भन्टावारीमा प्राथमिक उपचारका लागि पुर्यायो ।
अस्पतालका चिकित्सकका अनुसार शिशु भर्खरै जन्मिएको देखिन्छ र उद्धारको समयमा अवस्था सामान्य थियो ।
त्यसैगरी, झापाको बुद्धशान्ति गाउँपालिका–७, सुनमाईस्थित एक घरको बरन्डामा पनि अन्दाजी ४–५ दिनकी नवजात छोरी फेला परेकी छिन् ।
ताप्लेजुङ श्रिजंगा गाउँपालिका–७ का भाडावासी ओमप्रकाश तुमीहाङ लिम्बुले घरको बरन्डामा शिशु देखेपछि तत्काल इलाका प्रहरी कार्यालय बुधबारेलाई खबर गरेका थिए ।
प्रहरी टोली र स्थानीयवासीको उपस्थितिमा शिशुलाई उद्धार गरी प्रदेशीय अस्पताल भद्रपुर पुर्याइएको हो ।
अस्पतालका चिकित्सकले शिशुको स्वास्थ्य अवस्था सामान्य रहेको जनाएका छन् ।
प्रहरीले दुवै घटनामा शिशुहरूलाई फाल्ने व्यक्तिको खोजी र अनुसन्धान सुरु गरेको जनाएको छ ।
यी घटनाले समाजमा अझै पनि नवजात शिशु परित्यागजस्ता अमानवीय गतिविधि रोक्न चेतनाको आवश्यकता रहेको तथ्य उजागर गरेको छ ।
