फाइल तस्बिर
झापा/ असोज १८ देखि २० गतेसम्म परेको अविरल वर्षापछि आएको बाढीले झापाका किसानको मेहनत बगाएको छ । बाढीका कारण जिल्लाभर ४६३ दशमलव ४२ हेक्टर जमिनमा लगाइएको धानबाली पूर्ण रूपमा नष्ट भएको छ ।
कृषि ज्ञान केन्द्र झापाका प्रमुख सागर विष्टका अनुसार बाढीले ७०३ कृषकलाई करिब रु ५ करोड ७५ लाख २३ हजार बराबरको धान उत्पादनमा क्षति पुर्याएको छ । कुल १,६४४ दशमलव ३३ मेट्रिक टन धान बगाएको तथ्याङ्क केन्द्रले सार्वजनिक गरेको छ ।
“बाढीले अन्य कृषिबालीमा पनि असर गरेको छ, तर धानमा जति क्षति अरुमा छैन,” प्रमुख विष्टले भन्नुभयो, “पाक्न लागेको धान बगाउँदा किसानहरू गम्भीर समस्यामा परेका छन्।”
अविरल वर्षापछि कनकाई र विरिङ नदीमा आएको बाढीले गौरीगञ्ज, झापा गाउँपालिका, भद्रपुर, कनकाई, शिवसताक्षी र गौरादह नगरपालिकाका ५,०१२ दशमलव ६३ हेक्टर जमिनमा रहेका कृषिजन्य बाली बगाएको छ ।
यीमध्ये सबैभन्दा धेरै क्षति झापा गाउँपालिकामा भएको केन्द्रले जनाएको छ । सो पालिकाका वडा नं १, २ र ३ का ४३१ किसानको करिब रु ५ करोड १४ लाख ४७ हजार बराबरको धान, आलु र केरा बाली नष्ट भएको हो ।
स्थानीय किसानले सरकारले तत्काल राहत र क्षतिपूर्ति कार्यक्रम ल्याउन माग गरेका छन् ।
