उखुबारीमा रोइरहेकी नाबालिका फेला, घटना रहस्यमय

विराटनगर/ मोरङको धनपालथान गाउँपालिका–६ कदमाहास्थित एक उखुबारीमा करिब ६–७ महिनाकी नाबालिका बेवारिसे अवस्थामा फेला परेकी छन्।

मंगलबार साँझ करिब ६ः३० बजे स्थानीयले शम्भुप्रसाद यादवको उखुबारीबाट बालिकाको रोदन आवाज सुनेपछि गएर हेर्दा नाबालिका फेला परेकी थिइन्।

स्थानीयले तत्काल प्रहरीलाई खबर गरेपछि मोरङ प्रहरीको टोली घटनास्थल पुगेको थियो। प्रहरी टोली पुगेका बेला बालिका लगातार रोइरहेकी थिइन् भने उनको अभिभावक वा आफन्त कोही पनि आसपास भेटिएका थिएनन्।

मोरङ प्रहरीकी प्रवक्ता डीएसपी कोपिला चुँडालका अनुसार बालिकालाई सुरक्षाका लागि तत्काल स्थानीय सिजवना खातुनको जिम्मामा लगाइएको थियो। उनले भनिन्, “नाबालिकाका अभिभावक वा आफन्त कोही सम्पर्कमा आएका छैनन्। पहिचानका प्रयास भइरहेका छन्।”

बालिकाको स्वास्थ्य अवस्था सामान्य रहेको र संरक्षणका लागि बुधबार विराटनगर–१३ स्थित पूर्वाञ्चल बाल सेवा आश्रममा बुझाइएको प्रहरीले जनाएको छ।

प्रहरीले बालिकालाई कसले उखुबारीमा छाडेको हो भन्नेबारे विभिन्न कोणबाट अनुसन्धान अघि बढाएको छ।

घटना रहस्यमय रहेको भन्दै प्रहरीले त्यागिएको वा वेपत्ता प्रकरण दुबै सम्भावना खुला राखेको बताएको छ।