सुनसरी/ बराहक्षेत्र नगरपालिका–५ कालाबन्जर चोकस्थित सुबेक्षा मेडिकल पसलमा प्रहरीले ठूलो परिमाणमा नियन्त्रित औषधि बरामद गरेको छ।
विशेष सूचनाका आधारमा प्रहरी चौकी भरौलबाट खटिएको टोलीले सो मेडिकलमा छापा मारी SPASREST नामक ७८० ट्याब्लेट फेला पारेको हो।
प्रहरीका अनुसार मेडिकल सञ्चालिका ४० वर्षीया शान्ति राजधामीलाई नियन्त्रणमा लिएर थप अनुसन्धानका लागि इलाका प्रहरी कार्यालय महेन्द्रनगर, सुनसरीमा ल्याइएको छ।
बरामद औषधि र पक्राउ परेकी राजधामीलाई आवश्यक कारबाहीका लागि औषधि व्यवस्था विभाग, विराटनगरमा पठाइएको प्रहरीले जनाएको छ।
प्रहरीले स्वास्थ्यसेवा र औषधि व्यापारसँग सम्बन्धित कानुन उल्लंघन गर्ने गतिविधिमा संलग्नहरूलाई कारबाही कडा पार्ने चेतावनी समेत दिएको छ।
