झापा/झापाको मेचीनगर नगरपालिका–१३, चारआलीस्थित मनकामना अस्पताल प्रा.लि.का सञ्चालक चिकित्सक दिलीपकुमार यादव जबरजस्ती करणीको आरोपमा प्रहरीले पक्राउ गरेको छ।
इलाका प्रहरी कार्यालय धुलाबारीका अनुसार ४७ वर्षीय यादवले २७ वर्षीया युवतीमाथि जबरजस्ती करणी गरेको आरोप लागेपछि पक्राउ प्रक्रिया अघि बढाइएको हो। पीडित युवतीले दिएको उजुरीका आधारमा प्रहरीले उनलाई नियन्त्रणमा लिएको जनाएको छ।
प्रहरीका अनुसार यादवविरुद्ध प्रारम्भिक अनुसन्धान सुरु गरिएको छ र घटनासम्बन्धी थप प्रमाण संकलन कार्य जारी छ।
स्थानीयवासीका भनाइअनुसार यादवविरुद्ध यसअघि पनि सेवाग्राहीप्रति असहज र अनुचित व्यवहार गरेको गुनासो आइरहेको थियो। प्रहरीले ती गुनासोसम्बन्धी पनि छुट्टै रूपमा बयान लिने तयारी गरेको जनाएको छ।
प्रहरीका अनुसार अनुसन्धान पूरा भएपछि आवश्यक कानुनी प्रक्रिया अघि बढाइने छ।
