_1693980289.gif "#")
झापा/ झापाको दमक नगरपालिका–५ स्थित धनेश्वर मन्दिर नजिकै आइतबार बिहान बेवारिसे अवस्थामा एक थान ३०३ राइफल फेला परेको छ।
बिहान करिब ७ः३० बजे स्थानीयले बन्दुक देखेपछि इलाका प्रहरी कार्यालय दमकलाई खबर गरेका थिए। सूचना पाएलगत्तै प्रहरी निरीक्षक नबिन राईको कमाण्डमा खटिएको टोलीले घटनास्थल पुगेर अनुसन्धान गर्दा उक्त राइफल २०८२ साल भदौ २४ गतेको ‘जेनजी’ आन्दोलनका क्रममा इलाका प्रहरी कार्यालय दमकबाट लुटिएको भएको पुष्टि भएको हो।
प्रहरीका अनुसार राइफलसँगै म्यागजिन पनि फेला परेको छ। फेला परेको हतियारलाई नियन्त्रणमा लिएर पुनः इलाका प्रहरी कार्यालय दमकमा सुरक्षित राखिएको जनाएको छ।
‘जेनजी’ आन्दोलनका क्रममा देशभरका विभिन्न प्रहरी कार्यालयबाट लुटिएका केही हतियार अझै फेला नपरेका बेला दमकमा ३०३ राइफल पुनः बरामद हुनु प्रहरीले पाएको उल्लेखनीय सफलता मानिएको छ। घटनाबारे थप अनुसन्धान भइरहेको प्रहरीले जनाएको छ।
