धरान/ सुनसरीको धरान उप–महानगरपालिका–२० मा प्रहरीले ठूलो परिमाणमा लागू औषध बरामद गरेको छ।
विशेष सूचनाका आधारमा शनिबार राति ८:३० बजेतिर इलाका प्रहरी कार्यालय धरानबाट खटिएको टोलीले दुई युवालाई नियन्त्रणमा लिएको हो।
धरान–८ का १९ वर्षीय नलन तामाङले चलाएको को २८ प २४१० नम्बरको स्कुटर र सो स्कुटरमा सवार २१ वर्षीय प्रकाश लिम्बुलाई प्रहरीले चेकजाँच गर्ने क्रममा ठूला मात्रामा औषधीय ट्याब्लेट फेला परेको जनाएको छ।
प्रकाश लिम्बुको झोलाभित्र Tramol–50 (Tramadol Hydrochloride Capsule I.P) का २,७०० क्याप्सुल र Dicyclomine HCL Tablets 20 mg का २,५१० ट्याब्लेट, गरी जम्मा ५,२१० ट्याब्लेट बरामद गरिएको प्रहरीले जनाएको छ।
बरामद औषधीय पदार्थ लागू औषध ऐनअन्तर्गत प्रतिबन्धित सूचिमा पर्ने भएकाले उनीहरूलाई स्कुटरसहित नियन्त्रणमा लिएर थप अनुसन्धान भइरहेको इलाका प्रहरी कार्यालय धरानले जनाएको छ।
