_1693980289.gif "#")
फाईल तस्बिर
सुनसरी/ धरान–नडाहा सडकखण्डमा मोटरसाइकल दुर्घटनामा घाइते भएका धरान–५ का ४० वर्षीय बिनोद विश्वकर्माको मृत्यु भएको छ।
प्रहरीका अनुसार मिति २०८२ असोज १० गते साँझ करिब ५ बजेर १० मिनेटमा बराहक्षेत्र नगरपालिका–३ धरान–नडाहा भित्री सडकमा को ३५ प ७३७२ नम्बरको मोटरसाइकल अनियन्त्रित भई दुर्घटना भएको थियो। उक्त मोटरसाइकल धरानबाट नडाहा तर्फ जाँदै गरेको बताइएको छ।
दुर्घटनामा चालक धरान–५ का २९ वर्षीय बिक्रम विश्वकर्मा सकुशल रहँदा पछाडि सवार बिनोद विश्वकर्मा घाइते भएका थिए। उनको टाउको र बायाँ काँधमा चोट लागेको थियो।
घाइते विश्वकर्मालाई चालकले तत्कालै उपचारका लागि बीपी कोइराला स्वास्थ्य विज्ञान प्रतिष्ठान, घोपा, धरान लगेका थिए।
प्राथमिक उपचारपछि उनी सामान्य अवस्थामा घर फर्किएका थिए। तर, असोज २४ गते बिहान करिब ६ बजे आफ्नै घरमा उनको मृत्यु भएको प्रहरीलाई जानकारी गराइएको छ।
प्रहरीका अनुसार बिनोद विश्वकर्मा लामो समयदेखि फोक्सो र मिर्गौलाको दीर्घरोगी पनि रहेका थिए।
उनको शव कानूनी प्रक्रिया पूरा गरी पोष्टमार्टमका लागि बीपी कोइराला स्वास्थ्य प्रतिष्ठान पठाइएको थियो।
पोष्टमार्टमपछि शव छोरी एलिना विश्वकर्माले बुझी लगेको जिल्ला प्रहरी कार्यालय सुनसरीले जनाएको छ।
