सुनसरी/जिल्ला सुनसरीको कोशी गाउँपालिका–२ मा अवैध लागुऔषध कारोबार भइरहेको विशेष सूचनाका आधारमा प्रहरीले दुई जनालाई पक्राउ गरेको छ।
मिति २०८२ असोज २२ गते राति ११:१५ बजे इलाका प्रहरी कार्यालय लौकहीबाट खटिएको टोलीले उत्तर–दक्षिण भित्री सडकखण्डमा पैदल यात्रुहरूको चेकजाँच गर्ने क्रममा उनीहरूलाई नियन्त्रणमा लिएको हो।
पक्राउ पर्नेमा बराहक्षेत्र नगरपालिका–१०, प्रकासपुरका २६ वर्षीय सरोज विश्वकर्मा र कोशी गाउँपालिका–२ का २१ वर्षीय सनम माझी रहेका छन्।
चेकजाँचका क्रममा सनम माझीको रातो झोलामा लुकाइएका २,४०० पिस Tramol-50 ट्याब्लेट, १०० पिस Nitzascen-10 ट्याब्लेट, र Laborate लेखिएको झोल १ बोतल सहितको जम्मा २,५०० पिस लागुऔषध बरामद गरिएको प्रहरीले जनाएको छ।
बरामद गरिएका लागुऔषधसहित दुबै जना हाल जिल्ला प्रहरी कार्यालय सुनसरीमा नियन्त्रणमा रहेका छन् र थप अनुसन्धान तथा कानुनी कारबाही अघि बढाइएको प्रहरी स्रोतले जानकारी दिएको छ।
प्रहरीले हालै लागुऔषध कारोबार र ओसारपसार विरुद्ध सशक्त अभियान सञ्चालन गरेको र यस्ता अवैध क्रियाकलापमा संलग्न व्यक्तिमाथि कडा कारबाही गरिने चेतावनी पनि दिएको छ।
